ეკა ბესელიას ხვალ ,,რედისონთან“ ,,ტაბურეტკებით“ დახვდებიან

საზოგადოება - 00:27, 20 Jun, 2013

1075

აღნიშნულ აქციას ხვალ 10:00 საათზე სამოქალაქო საზოგადოების ნაწილი საგანგებოდ მართავს, სადაც იმავე დროს ,,რედისონში" კომიტეტის მიერ დაგეგმილი ღონისძიება იმართება.

ორანიზაციის წევრები აღშფოთებას გამოხატავენ ადამიანის უფლებათა დაცვის კომიტეტის მიერ 17 მაისის მოვლენების შეფასებასთან დაკავშირებით და აცხადებენ, რომ იგი ადამიანის უფლებების იდეის გაუფასურებას ემსახურება:

"ჩვენ, ვინც აღშფოთებულები ვართ 17 მაისის მოვლენების ადამიანის უფლებათა საპარლამენტო კომიტეტისეული შეფასებებით და მიგვაჩნია, რომ იგი არა მხოლოდ ეწინააღმდეგება ადამიანის უფლებათა საერთაშორისო სტანდარტებს და ფაქტების უხეშ ინტერპრეტაციას წარმოადგენს, არამედ, საერთოდ, ადამიანის უფლებების იდეის გაუფასურებას ემსახურება. ხვალ, ხუთშაბათს, 20 ივნისს ვიღვიძებთ ადრე და სამსახურში, სასწავლებელში ან სხვა საქმეზე წასვლამდე ჩვენს სამოქალაქო ვალდებულებას ვასრულებთ!

ჩვენი აქციის მიზანია პარლამენტის ადამიანის უფლებათა კომიტეტს და მის თავმჯდომარეს, ეკა ბესელიას ვაჩვენოთ, რომ პეტიციას ნამდვილი ადამიანები აწერენ ხელს, რომლებსაც აქვთ ჩამოყალიბებული პოზიცია 17 მაისის მოვლენებთან დაკავშირებით. აქციაზე მივიტანთ ამობეჭდილ ფოტოებს, რომელიც "ფეისბუქზე" შექმნილ გვერდზე გავრცელდა, სადაც პეტიციის ხელმომწერები რეგისტრაციის ნომრებს უთითებენ, ასევე ტაბურეტებს, როგორც ადამიანის უფლებების უგულვებელყოფის თანამედროვე, ქართულ სიმბოლოს", - ნათქვამია სამოქალაქო საზოგადოების ნაწილის მიერ გავრცელებულ განცხადებაში.

24 მაისს საქართველოს პარლამენტში საქართველოს მოქალაქეთა პეტიცია შევიდა, რომელსაც თან 12 000 ხელმოწერა ჰქონდა დართული. პეტიციაზე ხელმოწერა ისევ გრძელდება და ამ დროისთვის მას 14 700-ზე მეტი ადამიანი აწერს ხელს.

"თუ თქვენ ხართ პეტიციის ხელმომწერი, ან იზიარებთ ამ პოზიციას, გთხოვთ, მობრძანდეთ 20 ივნისს, სასტუმრო "რადისონთან" 10:00 საათზე. წამოიღეთ ტრანსფარანტები და ტაბურეტები (შესაძლებლობების ფარგლებში). ადამიანის უფლებების კომიტეტს არ აქვს ჩვენი უფლებების გაყალბების უფლება!", - აცხადებენ აქციის ორგანოზატორები.