არაბულმა ქვეყნებმა კატარს ულტიმატუმის ვადა გაუხანგრძლივეს

მსოფლიო - 15:40, 03 Jul, 2017

1344

არაბულმა ქვეყნებმა კატარს ულტიმატუმის ვადა გაუხანგრძლივეს. მოთხოვნების დასაკმაყოფილებლად ოფიციალურ დოჰას დამატებით 48 საათი აქვს.

ორი კვირის წინ, კატართან დიპლომატიური ურთიერთობების აღდგენის სანაცვლოდ, ოთხმა არაბულმა ქვეყანამ, ოფიციალურ დოჰას 13 პუნქტიანი მოთხოვნების სია გაუგზავნა.

ბაჰრეინი, საუდის არაბეთი, არაბთა გაერთიანებული საემიროები და ეგვიპტე ოფიციალური დოჰასგან ითხოვენ - გაწყვიტოს ირანთან კონტაქტი, დახუროს თურქული სამხედრო ბაზა და ტელეკომპანია „ალ-ჯაზირა“, მისი ყველა ფილილიალით, რომელსაც აღნიშნული ქვეყნები პროპაგანდის გავრცელებაში სდებენ ბრალს.

ტერორისტული საფრთხის შემცირების მიზნით, კატარს რეკომენდაცია ეძლევა შეწყვიტოს საუდის არაბეთის, არაბთა გაერთიანებული საემიროების, ბაჰრეინისა და ეგვიპტის მოქალაქეების ნატურალიზება და ყველა იმ ძებნილი პირის გადაცემა, ვინც კატარში იმალება.

მოთხოვნებში ასევე წერია, რომ კატარმა ნატოს წევრ ქვეყნებთან ყოველგვარი კონტაქტი უნდა შეწყვიტოს და შეაჩეროს ტერორიზმის მხარდაჭერა, მათ შორის, ინფორმაციული თვალსაზრისით.

მოთხოვნების შესასრულებლად კატარს ორკვირიანი ვადა მიეცა. ოფიციალურ დოჰას შეთავაზება კუვეიტის მთავრობამ გაუგზავნა, რომელიც დიპლომატიურ კრიზისში შუამავლის როლს ასრულებს.

ოფიციალური დოჰა ულტიმატუმის პირობებს "არარეალისტურს" უწოდებს.

სპარსეთის ყურეში დიპლმატიური კრიზისი 5 ივნისს დაიწყო.

ბაჰრეინმა, არაბთა გაერთიანებულმა საამიროებმა, ეგვიპტემ, იემენმა, ლიბიის დროებით მთავრობამ, მალდივის რესპუბლიკამ და მავრიკიმ ოფიციალური დოჰა ტერორიზმისა და ექსტრემისტური იდეოლოგიის დაფინანსებასა და მხარდაჭერაში დაადანაშაულეს და მასთან დიპლომატიური ურთიერთობა გაწყვიტეს.

კატარი ტერორიზმის „ძალიან მაღალი დონით“ დაფინანსებაში დაადანაშაულა და დაფინანსების შეწყვეტისკენ მოუწოდა აშშ-ის პრეზიდენტმა დონალდ ტრამპმაც.