სამსახურებრივი უფლებამოსილების გადამეტებისთვის ზვიად გრიგალაშვილი დააკავეს

სამართალი - 11:45, 19 Jun, 2013

858

ამის შესახებ პროკურატურის მიერ გავრცელებულ განცხადებაშია აღნიშნული.

"შიდა ქართლისა და მცხეთა-მთიანთის საოლქო პროკურატურის საგამოძიებო ნაწილის წარმოებაშია სისხლის სამართლის საქმე, 2012 წლის 1 ოქტომბერს ხაშურის N35-ე საოლქო საარჩევნო ოლქის ცალკეულ საარჩევნო უბნებზე არჩვენების გაყალბების ფაქტზე, დანაშული გათვალისწინებული სსკ ის 164-3 პრიმა მუხლით.

გამოძიების დაწყებას საფუძვლად დაედო 35-ე ხაშურის საოლქო საარჩევნო კომისიიდან გადმოგზავნილი მასალები.

2012 წლის 1 ოქტომბერს, საპარლამენტო არჩევნების დროს, შსს კონსტიტუციური უსაფრთხოების დეპარტამენტის შიდა ქართლის რეგიონული სამმართველოს მეორე განყოფილების უფროსმა-გამომძიებელმა (ხაშურის განყოფილების უფროსი) ზვიად გრიგალაშვილმა, სამსახურებრივი უფლებამოსილების გადამეტებით, ძალადობის გამოყენებით, ხაშურის N35-ე საარჩევნო ოლქის მე-4 უბანზე უბნის დამკვირვებელს არჩილ გოგალაძეს ფიზიკური შეურაცხყოფა მიაყენა, რის შედეგადაც არჩილ გოგოლაძემ სხეულის მსუბუქი ხარისხის დაზიანება მიიღო, ჯანმრთელობის ხანმოკლე მოშლით.

2013 წლის 18 ივნისს ზვიად გრიგალაშვილი დაკავებული იქნა სისხლის სამართლის კოდექსის 333-ე მუხლის მე-3 ნაწილი "ბ" ქვეპუნქტით გათვალისწინებული დანაშაულის ჩადენისთვის", - აღნიშნულია განცხადებაში.