ამის შესახებ ექსკლუზიურად "ექსპრესნიუსი" წერს და აღნიშნავს, რომ დაანონსებული კადრების ნაწილი სააგენტოს რედაქტორმა თავად ნახა.
"ექსპრესნიუსის" მიხედვით, შემზარავ კადრებზე აღბეჭდილია 2007 წელს ქუთაისში კრიმინალური სამყაროს წევრების წინააღმდეგ ჩატარებული სპეცოპერაციის შემდგომი პერიოდი, კერძოდ კი ადგილობრივი ე.წ. კანონიერი ქურდის გაიოზ ზვიადაძის, იგივე "გია კუატისსკის" სახლში მომხდარი წამების, ღირსების შემლახავი მოპყრობისა და სექსუალური ძალადობის სცენები.

"გია კუტაისსკის" კერძო სახლი 2007 წლის ოქტომბერში ჩამოერთვა და მოგვიანებით იმდროინდელმა შს მინისტრმა ვანო მერაბიშვილმა სწორედ ამ სახლის წინ ჩატარებულ ბრიფინგზე აღნიშნა, რომ საცხოვრებელი პოლიციის განყოფილებად გადაკეთდებოდა და სწორედ აქ დაიკითხებოდნენ კრიმინალურ საქმიანობაში მხილებული პირები.

სააგენტო აღნიშნავს, რომ კადრებზე აღბეჭდილია მამაკაცებზე, სავარაუდოდ, კრიმინალური სამყაროს წევრობისთვის დაკავებულ პირებზე სექსუალური ძალადობა, რომელიც ზემოთხსენებული სახლის ბილიარდის დარბაზში, ბილიარდის მაგიდაზე ხდებოდა და ძალადობის საგნებად კიი და რეზინის ხელჯოხი იყო გამოყენებული.

"ექსპრესნიუსის" ექსკლუზივში აღნიშნულია, რომ სწორედ ამ ფორმით ძალადობის შემდეგ კადრში ჩანან ძალადობის მსხვერპლი მამაკაცები, რომლებიც ობიექტივის წინ ამბობენ, რომ მზად არიან ითანამშრომლონ პოლიციასთან, თუკი საიდუმლოდ დარჩება ის, რაც მოხდა.
სავარაუდოდ, ზემოთხსენებულ კადრებს დღეს შს მინისტრი დიპლომატებს წარუდგენს, მოგვიანებით კი მისი ნაწილის მედიით გავრცელებასაც არ გამორიცხავენ.

"ექსპრესნიუსი" წერს, რომ ფირი ზემოთხსენებული კადრებით სამეგრელოში აღმოჩენილ სამალავებში იპოვეს, თუმცა, არაა მითითებული ამ ინფორმაციის წყარო.

"ნიუპოსტის" ინფორმაციით, ვიდეომასალაში, რომლებსაც დღეს შს მინისტრი დიპლომატებს წარუდგენს, ქუთაისში მომხდარი წამებისა და ღირსების შემლახავი მოპყრობის ამსახველი სცენების გარდა, ზოგიერთი პოლიტიკოსისა და ცნობილი პირის პირადი ცხოვრების ამსახველი, ფარულად გადაღებული კადრებიც შედის.

შენიშვნა: მასალაზე თანდართული ფოტო წარმოადგენს ილუსტრაციას და არ ასახავს სტატიაში აღწერილ ფაქტებს.