„სტარტაპ საქართველომ” ღია კარის დღე გამართა

ბიზნესი & ეკონომიკა - 12:10, 29 Jun, 2017

1227

„სტარტაპ საქართველოს“ ღია კარის დღე გაიმართა ტექნოლოგიურ პარკში, რომელშიც პროგრამის კოორდინატორების გარდა, გამარჯვებულმა სტარტაპერებმაც მიიღეს მონაწილეობა. პროგრამის კოორდინატორებმა პოტენციურ აპლიკანტებს კონკურსში მონაწილეობის წესებისა და პირობების შესახებ მიაწოდეს ინფორმაცია და მათ შეკითხვებს გასცეს პასუხი. გამარჯვებულმა სტარტაპერებმა კი საკუთარი ბიზნეს იდეების პრეზენტაცია გამართეს.

„სტარტაპ საქართველოს“ 79 გამარჯვებული ჰყავს, მათ შორის 59 ბიზნეს იდეა ინოვაციურ კომპონენტს ეკუთვნის. გამარჯვებული სტარტაპ იდეების განხორციელება ეტაპობრივად მიმდინარეობს. „სტარტაპ საქართველომ“ უკვე გამართა „ავტომობილების ვერტიკალური პარკირების“, „ონლაინ კლინიკისა“ და „ინოვაციური დიზაინის დეკორატიული აგურების წარმოების“ პროექტების პრეზენტაციები.

დამწყები საწარმოების (სტარტაპების) ხელშეწყობის პროგრამას" მთავრობის ინიციატივით საპარტნიორო ფონდი და ინოვაციების და ტექნოლოგიების სააგენტო ერთობლივად ახორციელებენ. „სტარტაპ საქართველო" მაღალტექნოლოგიური და ინოვაციური კომპონენტებისგან შედგება.

„სტარტაპ საქართველო“ პროგრამის ინოვაციურ კომპონენტში ბიზნეს პროექტებსა და აპლიკაციებს უწყვეტ რეჟიმში იღებს. განაცხადის ფორმა, შევსების წესი და პროგრამის შესახებ დეტალური ინფორმაცია განთავსებულია ინტერნეტ გვერდზე www.startup.gov.ge დამატებითი ინფორმაციისთვის მუშაობს ცხელი ხაზი: 2 03 31 23

„სტარტაპ საქართველო“ პოტენციური სტრატაპერებისთვის ღია კარის დღეს ყოველთვიურად მართავს.