პუტინის გინებისთვის დაჯარიმებულმა, მინისტრს, მისი შემგინებლის დასჯა მოსთხოვა

საზოგადოება - 21:25, 18 Jun, 2013

1214

"დროა" და "თავისუფალი ზონის" წარმომადგენლები სპორტისა და ახალგაზრდობის სამინისტროსთან ანაკლიის პატრიოტთა ბანაკის სახეცვლილებასთან დაკავშირებულ საკითხებს აპროტესტებდნენ. ლევან ყიფიანის ინიციატივით, აქციის მონაწილეები სამინისტროში შეხვედრაზე მიიწვიეს. მათ პირადად მინისტრი და რამდენიმე სხვა თანამშრომელი შეხვდნენ, თუმცა, საუბარი ხმაურის ფონზე წარიმართა.

როგორც შეხვედრაზე მყოფი "ნიუპოსტის" ჟურნალისტი იტყობინება, "თავისუფალი ზონის" ერთერთმა წევრმა, გოგოხიამ სამინისტროს თანამშრომლისგან შენიშვნა დაიმსახურა ხმამაღალი საუბრის გამო, ხოლო მას შემდეგ, რაც გოგოხიამ შენიშვნა უსაფუძვლოდ ჩათვალა, თანამშრომელმა მას შეაგინა. გოგოხიამ, რომელიც ერთ-ერთია მათ შორის, ვინც რუსეთის პრეზიდენტის ვლადიმირ პუტინის გინების გამო დაჯარიმდა, ლევან ყიფიანს მიმართა: "მე რომ დავჯარიმდი პუტინის გინების გამო, ეს კაცი რატომ არ ჯარიმდება?", რასაც მინისტრის რეაქცია მოჰყვა, რომ სამინისტროს თანამშრომელი აუცილებლად დაისჯებოდა, რის შემდეგაც თანამშრომელი დაცვამ გაიყვანა დარბაზიდან.

ლევან ყიფიანმა განაცხადა, არსებობს იმის ამსახველი ფოტო და ვიდეო მასალა, რომ ანაკლიის პატრიოტთა ბანაკში არსებული ინვენტარი დღემდე დასაწყობებული და ხელუხლებელია. მისივე ინფორმაციით, აღნიშნული მასალა დაინტერესებულ მხარეებს მოთხოვნის შესაბამისად გადაეცემათ. მინისტრმა ახალგაზრდებს ასევე მოუწოდა, წარმოადგინონ პატრიოტული სიმბოლიკის მქონე ინვენტარის განადგურების ფაქტები და რეაგირებას ამ შემთხვევაში მოახდენს. "თუმცა ამგვარი ფაქტები ბუნებაში არ არსებობს", - აღნიშნა ლევან ყიფიანმა, რასაც ახალგაზრდების პასუხი მოჰყვა: "ჩვენ გვაქვს ვიდეომასალა და მას წარმოგიდგენთ, თქვენ კი პირობა დადეთ, რომ ვიდეომასალის ნახვის შემდეგ პასუხისმგებლობას აიღებთ და გადადგებით", რაზეც ლევან ყიფიანმა უპასუხა, რომ ის არაფერ შუაშია, რადგან მაისურებისა და კეპების დაწვის ბრძანება არ გაუცია.

საბოლოოდ, საუბარი ახალგაზრდების დემარშით დასრულდა: მათ სამინისტრო პროტესტის ნიშნად დატოვეს, მოგვიანებით კი საპროტესტო აქცია დაასრულეს.

"ნიუპოსტის" ინფორმაციით, საპროტესტო აქცია, სპორტისა და ახალგაზრდობის სამინისტროს პარალელურად, ანაკლიის პატრიოტთა ბანაკის მიმდებარედაც ტარდებოდა.

ორგანიზაციების: "დროა" და "თავისუფალი ზონა" წევრები მომხდარ დაპირისპირებასთან დაკავშირებით "ნიუს.ჯი"-სა და "აფხაზეთის ხმის" ერთობლივ "პრესკლუბში მე-17 სართულზე" 22:00 საათზე ბრიფინგს გამართავენ.