ნავალნის რეიტინგმა კრემლი შეაშფოთა- ოპოზიციონერს საპრეზიდენტო არჩევნებში მონაწილეობა აუკრძალეს

მსოფლიო - 20:41, 24 Jun, 2017

4809

რუსი ოპოზიციონერის ალეკსეი ნავალნის პოპულარობა ბოლო ერთი წლის განმავლობაში მკვეთრად გაიზარდა. ბოლო კვლევების თანახმად მისმა ცნობადობამ რუსეთის მოსახლეობაში 10%-ით მოიმატა.

სწორედ ამიტომ კრემლის დავალებით, სოციოლოგიურმა სამსახურებმა, ნავალნის საქმიანობის მიმართ მოსახლეობის დამოკიდებულების მასშტაბური შესწავლა დაიწყეს.

როგორც რუსი ექსპერტები აღნიშნავენ, მიუხედავად იმისა, რომ ვლადიმერ პუტინს ნავალნისთვის პოლიტიკური კონკურენტი არასოდეს უწოდებია და მას არა სახელით არამედ, როგორც „ის ბატონი“ ისე მოიხსენიებს, ნავალნი ამ დროისთვის ქვეყანაში ნომერ 2 პოლიტიკოსია.

„ცხადია, რომ რუსეთში ამჟამად პუტინის შემდეგ ალეკსეი ნავალნია ნომერ მეორე პოლიტიკოსი. მან გადაუსწრო ყველას ვინც აქამდე პუტინს დაპირისპირებია“- აცხადებს პოლიტოლოგი აბას გალიამოვი.

ნავალნის რეიტინგით კრემლის შეშფოთების ლოგიკური გაგრძელებაა ის, რომ მას რუსეთის საპრეზიდენტო არჩევნებში მონაწილეობის უფლება ოფიციალურად აუკრძალეს. ცენტრალური საარჩევნო კომისიის ვებ გვერდზე გამოქვეყნებული განცხადების თანახმად, მომავალი წლის არჩევნებში ოპოზიციის ლიდერი საკუთარი კანდიდატურის დაყენებას, სახელმწიფო ქონების მითვისების საქმეზე ნასამართლეობის გამო ვერ შეძლებს.