მორიგი დარტყმა - ტრამპი პუტინთან შეხვედრაზე უარს ამბობს

მსოფლიო - 14:35, 23 Jun, 2017

9079

ამერიკის შეერთებული შტატების პრეზიდენტის დონალდ ტრამპისა და რუსეთის პრეზიდენტის ვლადიმერ პუტინის შეხვედრის საკითხი, რომელიც სავარაუდოდ ივლისში უნდა გამართულიყო, ჯერჯერობით "ჰაერშია ჩამოკიდებული".

როგორც ცნობილია, G20-ის მორიგი შეხვედრა ჰამბურგში, ივლისში უნდა გაიმართოს. სავარაუდოდ სწორედ აქ იგეგმებოდა პუტინისა და ტრამპის შეხვედრა, თუმცა ორი პრეზიდენტის ადმინისტრაციას შორის ამის შესახებ შეთანხმება მიღწეული არ არის, რასაც პუტინის პრესმდივანი დიმიტრი პესკოვიც ადასტურებს.

მისი განცხადებით, მოსკოვში ამ მიმართულებით არანაირი მზადება მიმდინარეობს და ჰამბურგში ორ პრეზიდენტს შორის შეხვედრა არ შედგება.

"პუტინი და ტრამპი მონაწილეობას მიიღებენ G20-ის შეხვედრაში, შესაბამისად, შესაძლოა ისინი გადაიკვეთონ და შედგეს მათი საუბარი, თუმცა, ეს არ იქნება მომზადებული შეხვედრა, რადგან მასზე შეთანხმება არ არსებობს," - განაცხადა პესკოვმა.

რუსეთის საგარეო საქმეთა სამინისტროში აცხადებენ, რომ მოსკოვი მზადაა ამ შეხვედრისთვის და თუ რამე შეფერხებაა ამ მიმართულებით, ეს ამერიკული მხარის პოზიციის გამო ხდება.

"ტრამპის ადმინისტრაციასთან ახალი კონტაქტებისა და ურთიერთმოქმედების პერიოდი ჯერჯერობით უკეთესობისკენ გადადგმული ნაბიჯებით არ გამოირჩევა," - აცხადებენ საგარეო საქმეთა სამინისტროში.

მოსკოვი ამ შეფერხებას აშშ-ს შიდაპოლიტიკურ პროცესებს აბრალებს. მათი აზრით, აშშ-ში გარკვეული წრეები ცდილობენ რუსეთის ფაქტორი გარკვეულ კონტექსტში გამოიყენონ.

თავად ლავროვი აშშ-ში რუსოფობიის გაძლიერებაზე საუბრობს. მისი სიტყვებით, სანქცირებულ პირთა თუ ორგანიზაციათა ახალი სია. რომელიც რამდენიმე დღის წინ გამოქვეყნდა აშშ-ში და კანონპროექტი, რომელიც სანქციების რეჟიმის განკაცრებას ეხება, ხელოვნურად არის მიბმული უკრაინის საკითხთან და მასში ღიმილს იწვევს.

თუმცა, საეჭვოა რუსეთში ვინმეს სანქციებზე ეღიმებოდეს. ისინი ძლიერ დარტყმას აყენებს ეკონომიკას და განსაკუთრებით პუტინის გარემოცვის შემოსავლებს.

შეგახსენებთ, რომ არჩევის შემდეგ ტრამპს ორი სატელეფონო კონტაქტი ჰქონდა პუტინთან, მათგან უკანასკნელი მაისში გაიმართა. თუმცა, როგორც The Wall Street Journal-ი იუწყება, ამას ურთიერთობებში პროგრესი არ მოჰყოლია. პუტინმა ტრამპს მარტში ფინეთში შეხვედრაც შესთავაზა, თუმცა, უარი მიიღო.

როგორც ექსპერტები აცხადებენ, აშშ-სა და რუსეთს შორის ასეთი დაძაბული ურთიერთობა 2008 წლის შემდეგ არ ყოფილა. წინამორბედი ობამასგან განსხვავებით, ტრამპი გაცილებით შეუვალ პოზიციას იკავებს