ტერეზა მეი მზად არის, ბრიტანეთში მცხოვრებ ევროკავშირის მოქალაქეებს მუდმივი ბინადრობის სტატუსი მიანიჭოს

მსოფლიო - 11:00, 23 Jun, 2017

1474

დიდი ბრიტანეთის პრემიერმა, ტერეზა მეიმ, ევროკავშირის ლიდერებთან შეხევდრისას მზადრყოფნა გამოთქვა, ევროკავშირის იმ მოქალაქეებს, რომლებიც ბოლო 5 წლის განმავლობაში გაერთიანებულ სამეფოში ცხოვრობდნენ, ბრექითის შემდეგ მუდმივი ბინადრობის სტატუსი მიანიჭოს.

დიდი ბრიტანეთის ევროკავშირიდან გასვლის შემდეგ, ეს სტატუსი მათ უფლებას მისცემს იცხოვრონ და ისარგებლონ საზოგადოებრივი, განათლების, ჯანდაცვის სერვისებით, ასევე სოციალური შეღავათებით.

თუმცა, ჯერჯერობით უცნობია, რა დროიდან დაიწყება 5-წლიანი ცხოვრების ათვლა.

ტერეზა მეიმ ხაზგასმით აღნიშნა, რომ მისი შეთავაზება ძალაში მხოლოდ იმ შემთხვევაში შევა, თუკი ევროკავშირის სხვადასხვა ქვეყანაში მცხოვრებ ბრიტანეთის მოქალაქეებს იგივე უფლებები ექნებათ.

შეგახსენებთ, გაერთიანებულ სამეფოში რეფერენდუმი ზუსტად ერთი წლის წინ, გასული წლის 23 ივნისს ჩატარდა. ამომრჩეველთა 51,9%-მა ქვეყნის ევროკავშირიდან გასვლას დაუჭირა მხარი, 48,1 % წინააღმდეგი იყო.

ლონდონსა და შოტლანდიაში, ასევე ჩრდილოეთ ირლანდიაში ხმა ევროკავშირში დარჩენის სასარგებლოდ მისცეს, თუმცა უელსსა და ინგლისის საგრაფოებში ევროკავშირიდან გასვლას დაუჭირეს მხარი.

რეფერენდუმის შედეგების გამოცხადებისთანავე დიდი ბრიტანეთის პრემიერ-მინისტრმა დევიდ ქემერონმა თანამდებობა დატოვა. მისი თქმით, არასწორი იქნება, დარჩეს “გემის კაპიტნად” მაშინ, როდესაც დიდი ბრიტანეთის მოსახლეობამ სხვა გზა აირჩია.

დიდი ბრიტანეთის ახალმა პრემიერ-მინისტრმა ტერეზა მეიმ ლისაბონის 50-ე მუხლის ამოქმედების შესახებ ოფიციალურ წერილს ხელი 29 მარტს მოაწერა, რითაც ბრექსითი ოფიციალურად დაიწყო.

დიდი ბრიტანეთი ევროგაერთიანებას საბოლოოდ, სავარაუდოდ, 2019 წლის 29 მარტს დატოვებს.