ამის შესახებ ქარტლი.გე-ს კასპის მე-3 და მე-4 საჯარო სკოლების დირექტორებმა განუცხადეს.

,,შეხვედრას ნამდვილად ჰქონდა ადგილი რესურსცენტრის ხელმძღვანელის დავით ზანგურის კაბინეტში. სიმართლე გითხრათ, გვარი და სახელი ნამდვილად არ ვიცი ვინ იყო, ვიცი, რომ იყო უშიშროების წარმომადგენელი. შეკითხვა შეეხებოდა მხოლოდ პირად ინფორმაციას: რა განათლება მაქვს; როდის დავამთავრე უმაღლეს სასწავლებელი; რამდენი წლის მუშაობის სტაჟი მაქვს; დირექტორად არჩეული ვარ თუ მოვალეობის შემსრულებელი. აი, ეს იყო მისი კითხვები" – ამბობს კასპის მე-3 საჯარო სკოლის დირექტორი მარინა ქონიაშვილი.

მე-4 საჯარო სკოლის დირექტორი ქეთევან ხითარიძე ამბობს, რომ რესურსცენტრის უფროსის მიერ დაბარება უშიშროების წარმომადგენელთან, ,,ნაციონალური მოძრაობის" მმართველობის პერიოდში არსებულ სიტუაციას ჰგავს:

,,გვითხრა ბატონმა ზანგურმა, რომ პიროვნება მოვა, გაგესაუბრებათ. რაკი ჩვენმა უფროსმა ბატონმა ზანგურმა გვითხრა, რომ პიროვნება მოვა, საჭიროდ ჩავთვალეთ, რომ უნდა გავსაუბრებოდით. გიორგი გერმისაშვილმა მკითხა მე პირადად, თუ როდის დავამთავრე უმაღლესი; რა დავამთავრე; რამდენი წელია ვმუშაობ და ა.შ. მინდა გითრათ, რომ სამეურვეო საბჭოს არჩევნების შესახებ კითხვები საერთოდ არ დასმულა" – ამბობს მე-4 საჯარო სკოლის დირექტორი.

კასპის რესურსცენტრის უფროსი დავით ზანგური, რომელიც ხელახალა რამდენიმე კვირის წინ დაინიშნა, qartli.ge- ს ჟურნალისტს აგრესიულად დახვდა: ,,წადი ეხლა აქედან" – იყო მისი პასუხი.