თურქეთმა გაერთიანებული ერების ორგანიზაციის სისხლის სამართლის საერთაშორისო ტრიბუნალის მექანიზმის მოსამართლეს, აიდინ სეფა აკაის 7-ნახევარი წლით თავისუფლების აღკვეთა მიუსაჯა.

როგორც BBC იტყობინება, ანკარის სასამართლო აიდინ სეფა აკაის პრეზიდენტ ერდოღანის ოპოზიციონერ , აშშ-ში მცხოვრები სასულიერი პირს ფეთჰულა გიულენის „ტერორისტული ორგანიზაციის“ წევრობაში ადანაშაულებს.

გაეროს საერთაშორისო ტრიბუნალის მექანიზმის განცხადებით, თურქეთის გადაწყვეტილება დასაჯოს მოსამართლე, არის როგორც დიპლომატიური იმუნიტეტის ასევე საერთაშორისო სამართლის პრინციპების დარღვევა.

მოსამართლე თურქეთში 2016 წლის 21 სექტემბერში, თურქეთში განხორცილებული მასობრივი დაკავებებისას დააპატიმრეს. სასამართლომ ის გაათავისუფლა, თუმცა პასპორტი ჩამოართვა და ქვეყნის დატოვება აუკრძალა.

შეგახსენებთ, 2016 წლის 15 ივლისის ღამეს, თურქეთში სამხედრო ამბოხი მოხდა, რომლის ორგანიზატორად , ანკარა პრეზიდენტ ერდოღანის ოპოზოციონერ , სასულიერი პირს ფეთჰულა გიულენს ასახელებს და ვაშინგტონისგან მის ექსტრადირებას ითხოვს.

ფეთჰულა გიულენი 1999 წლიდან პენსილვანიაში ცხოვრობს.

სამხედრო გადატრიალების მოწყობის მცდელობას 230 ადამიანი ემსხვერპლა, მათი უმრავლესობა თავად სამხედროა.

15 ივლისის შემდეგ სამსახურიდან დაითხოვეს და დააპატიმრეს ათი ათასობით სამხედრო, მოსამართლე, პოლიციელი, მასწავლებელი. ქვეყანაში დაიხურა 100-ზე მეტი მედიასაშუალება, რის შედეგადაც სამსახურის გარეშე დარჩა 2 300-ზე მეტი ჟურნალისტი.

15 ივლისის მოვლენების შემდეგ თურქეთში მინიმუმ 99 ჟურნალისტი და მწერალი დააკავეს, მინიმუმ 330-ს აკრედიტაცია ჩამოართვეს.

სამხედრო გადატრიალების შემდეგ სულ 40 000 ადამიანი დააკავეს, სამსახურებიდან გაათავისუფლეს ან საქმიანობა შეუჩერეს 120 000-მდე ადამიანს.