BBC-ის გამოძიება - ბრიტანული იარაღის მწარმოებელი კომპანია ახლო აღმოსავლეთში სათვალთვალო სისტემებს ყიდის

მსოფლიო - 15:05, 15 Jun, 2017

1170

BBC-ის მიერ ჩატარებული ჟურნალისტური გამოძიებით დადგინდა, რომ წამყვანი ბრიტანული იარაღის მწარმოებელი კომპანია BAE Systems ახლო აღმოსავლეთის ქვეყნებში სათვალთვალო სისტემებს ყიდის. იარაღის შესახებ საერთაშორისო კანონმდებლობაში არსებული კლასიფიკაციის მიხედვით, ეს სისტემები "პოტენციალური შეიარაღების" გრიფით გადის.

მიწოდებულ სისტემებშ შორის არის დეშიფრაციის პროგრამული უზრუნველყოფა, რომელმაც, BBC-ის აზრით, თავად დიდი ბრიტანეთის ეროვნულ უსაფრთხოებას შეიძლება შეუქმნას პრობლემა.

BBC-სა და დანიური სააგენტო Dagbladet Information-ის კვლევამ აჩვენა, რომ ეს სისტემები მიეწოდებათ საუდის არაბეთს, არაბეთის გაერთიანებულ ემირატებს, კატარს, ომანს, მაროკოსა და ალჟირს.

თავად კომპანია BAE Systems-ში აცხადებენ, რომ ეს ტექნოლოგიები აღნიშნულ ქვეყნებს ტერორიზმთან ბრძოლაში ეხმარება და ეს გარიგებები არ არღვევს ბრიტანულ კანონმდებლობას.

თუმცა, ინგლისური მედიასაშუალება მიიჩნევს, რომ ამ ქვეყნებში შესაძლოა ეს სისტემები საკუთარი მოქალაქეების თვალთვალისათვის გამოიყენონ, რითიც უხეშად დაირღვევა ადამიანის უფლებები. ამასთან, არსებობს საფრთხე, რომ ისინი ტერორისტების ხელშიც აღმოჩნდნენ.