სოფლის მეურნეობის სამინისტროს თანამშრომლებმა სამინისტროს მიმდებარე ტერიტორია ბალახისა და პოლიეთილენის პარკებისგან გაათავისუფლეს. აქციის ფარგლებში სოფლის მეურნეობის მინისტრმა,შალვა ფიფიამ თანამშრომლებთან ერთად სამინისტროს ეზო დაასუფთავა.

"ჩვენ გადავწყვიტეთ ჩავრთულიყავით დასუფთავების აქციაში და თანამშრომლებთან ერთად ვასუფთავებთ სამინისტროს ეზოს. იმედი გვაქვს, რომ მსგავსს აქციებს მიეცემა სისტემატიური ხასიათი და მომავალ წლებშიც გაგრძელდება",-განაცხადა შალვა ფიფიამ.

სოფლის მეურნეობის სამინისტროში მიმდინარე აქციას შეუერთდა გარემოსა და ბუნებრივი რესურსების დაცვის მინისტრი ხათუნა გოგოლაძეც. "ჩვენი სამინისტროს ინიციატივით, მთელი საქართველოს მასშტაბით გამოცხადდა საყოველთაო დასუფთავების აქცია,რომელშიც ჩაერთო ბევრი ორგანიზაცია, მათ შორის აქტიური მონაწილეობა მიიღო სოფლის მეურნეობის სამინისტრომ, რომელიც წარმოდგენილი იყო სამინისტროსა და მისი საქვეუწყებო სტრუქტურების თანამშრომლებით, რისთვისაც დიდი მადლობა მინდა გადავუხადო მათ",-განაცხადა ხათუნა გოგოლაძემ.

"მწვანე თვის" ინიციატივა ხორციელდება გაეროს განვითარების პროგრამის (UNDP), გერმანიის საერთაშორისო თანამშრომლობის საზოგადოების (GIZ), კულტურისა და ძეგლთა დაცვის სამინისტროს, რეგიონული განვითარებისა და ინფრასტრუქტურის სამინისტროს და შპს "მყარი ნარჩენების მართვის კომპანიის" მხარდაჭერით.