დღეს სამინისტროს თანამშრომლებმა, გარემოს დაცვის სამინისტროს, მყარი ნარჩენების მართვის კომპანიასა და სტუდენტებთან ერთად, მცხეთის დედათა მონასტრის მიმდებარე ტერიტორია დაასუფთავეს. აქციაში მონაწილეობა რეგიონული განვითარების მინისტრმა, დავით ნარმანიამ, გარემოს დაცვის მინისტრმა, ხათუნა გოგალაძემ და გაეროს განვითარების პროგრამის ხელმძღვანელის მოადგილემ ინიტა პაულოვიჩამ მიიღეს.

მასშტაბური გარემოსდაცვითი კამპანია საქართველოს თითქმის ყველა რეგიონს მოიცავს. დასუფთავების აქციები იმართება 80-ზე მეტ ადგილას, მათ შორის, ისტორიული და კულტურული ძეგლების მახლობლად, სკოლების, უნივერსიტეტებისა და სამედიცინო დაწესებულებების შემოგარენში, ეროვნული პარკებისა და დაცული ტერიტორიების საგანგებოდ შერჩეულ უბნებზე.

აქციაში, რომლის ორგანიზატორიც გარემოსა და ბუნებრივი რესურსების დაცვის სამინისტროა, სამინისტროები, პარლამენტი, ადგილობრივი ხელისუფლებები, უნივერსიტეტები, ბიზნეს კომპანიები, არასამთავრობო და მედია ორგანიზაციები, აგრეთვე, მოხალისეები არიან ჩართულნი.