როგორც ადგილობრივი მოსახლეობა იტყობინება, ბანაკის შესასვლელში განთავსებული აბრა წარწერით: "პატრიოტები" უკვე ჩაანაცვლეს აბრით, რომელზეც წარწერილია: "იმედის ბავშვები". ბანაკში ახალი სეზონი, სავარაუდოდ, 1 ივლისს გაიხსნება.

ამასთან, ადგილზე მყოფმა ახალგაზრდობის საქმეთა სამინისტროს წარმომადგენლებმა ერთად მოუყარეს თავი და დაწვეს მაისურები, კეპები, სუვენირები და სხვა საყოფაცხოვრებო ნივთები წარწერით "პატრიოტები". ანაკლიელების თქმით, სამინისტროს წარმომადგენლებმა არ გაიზიარეს მოსახლეობის თხოვნა, რომ მაისურები და კეპები, დაწვის ნაცვლად, ადგილობრივებისთვის დაერიგებინათ.

შეგახსენებთ, რომ პატრიოტთა ბანაკი ანაკლიაში მას შემდეგ გაიხსნა, რაც რუსმა ოკუპანტებმა 2008 წელს ანაკლიის მოსაზღვრე სოფელ განმუხურში ანალოგიური პატრიოტთა ბანაკი გადაწვეს. ინტენსიური მუშაობის შემდეგ ანაკლიაში გახსნილმა ბანაკმა ახალი ნაკადი უკვე 2009 წლის ზაფხულიდან მიიღო. ანაკლიის პატრიოტთა ბანაკი დიდი მოწონებით სარგებლობდა როგორც ქართველ, ასევე პოსტსაბჭოთა ქვეყნებისა და ევროპის რამდენიმე ქვეყნის ახალგაზრდებში, რომლებმაც იქ დასვენება მოასწრეს.

ანაკლიის პატრიოტთა ბანაკში მიმდინარე პროცესებს გამოეხმაურა საქართველოს პარლამენტის წევრი "ნაციონალური მოძრაობიდან" მარიამ საჯაია:

"წარმოუდგენელია ამაზე მეტი მტრული დამოკიდებულება წარსულისადმი, შექმნილისადმი, მხოლოდ იმის გამო, რომ ის შენმა პოლიტიკურმა ოპონენტმა ააშენა! ვინმემ იცის მსგავსი მაგალითი ისტორიიდან, გარდა საბჭოთა პერიოდისა, როცა ქართველები ქართველებისვე გაკეთებულს ანგრევდნენ?! მხოლოდ ამ პერიოდისთვის იყო დამახასიათებელი ეკლესიების, ტაძრების, ყველანაირი წარსულის სიკეთის და რწმენის განადგურება", - უთხრა მარიამ საჯაიამ "ნიუპოსტს".

"რაც ანაკლიის საერთაშორისო პატრიოტულ ბანაკში ეხლა ხდება ეს არის ვანდალიზმი, მსგავს აკეთებდნენ მხოლოდ რუსი ოკუპანტები როდესაც წვავდნენ მას, "იმედის ბავშვები" და "პიონერთა ბავშვები" მათაც კი არ დაურქმევიათ", - უთხრა "ნიუპოსტს" სამეგრელოს ახალგაზრდული საინიციატივო ჯგუფის წევრმა ანი წითლიძემ.

ამასთან, ირკვევა, რომ ახალგაზრდობის საქმეთა სამინისტროს წარმომადგენლები ადგილობრივ თვითმმართველობასთან შეუთანხმებლად მოქმედებენ. ანაკლიის რწმუნებულიდავით ცხადაია ადასტურებს, რომ სამინისტროს წარმომადგენლები მართლაც იმყოფებიან ანაკლიის ახალგაზრდულ ბანაკში, მაგრამ მისთვის უცნობია, რას საქმიანობენ ისინი იქ.

შეგახსენებთ ასევე: დაახლოებით ერთი თვის წინ გაკეთებულ კომენტარებში ახალგაზრდობის საქმეთა სამინისტროს წარმომადგენლები აცხადებდნენ, რომ ანაკლიის საერთაშორიოს ბანაკის არსებობა კითხვის ნიშნის ქვეშ იდგა და მისი დაფინანსება "ფუჭი საქმე" იყო.