ოფიციალური თეირანი ტრამპის განცხადებას ამაზრზენს უწოდებს, ირანის ტერაქტს კი ,,ამერიკის კლიენტების მიერ მხარდაჭერილს“

მსოფლიო - 15:49, 08 Jun, 2017

2287

თეირანის ტერაქტთან დაკავშირებით ამერიკის შეერთებული შტატების პრეზიდენტის რეაქციას¸ რომელმც განაცხადა რომ მსხვერპლზე პასუხისმგებლობა ტერორიზმის მხარდამჭერებს ეკისრებათ, ირანში მძაფრი გამოხმაურება მოჰყვა. ირანის საგარეო საქმეთა მინისტრმა ჯავად ზარიფმა აშშ-ის ლიდერის განცხადებას ამაზრზენი უწოდა.

„თეთრი სახლის განცხადება და სენატის სანქციები ამაზრზენია, იმ დროს როდესაც ირანელები ამერიკის კლიენტების მიერ მხარდაჭერილი ტერორიზმის წინაშე აღმოჩნდნენ“- დაწერა ტვიტერზე ირანის მთავარმა დიპლომატმა, ამ განცხადებით მან 7 ივნისს განხორციელებულ ტერაქტებში ირიბად საუდის არაბეთი დაადანაშაულა, რომელიც რეგიონში ირანის მთავარ მტრად ითვლება.

თეირანის ტერაქტებში საუდის არაბეთი დაადანაშაულეს „რევოლუციის დამცველებმა“ და რეჟიმის ელიტურმა არმიამაც, ამასთანავე ხაზი გაუსვეს ელ რიადსა და ვაშინგტონს შორის არსებულ ურთიერთობასაც.

შეგახსენებთ 7 ივნისს ირანის პარლამენტში და ჰომეინის მაუზოლეუმში მომხდარ ტერაქტებს აშშ-ის პრეზიდენტი დონალდ ტრამპი გამოეხმაურა და ირანი ტერორიზმის მხარდაჭერაში კიდევ ერთხელ დაადანაშაულა:

„სახელმწიფო, რომელიც მხარს უჭერს ტერორიზმს, შესაძლოა თავად გახდეს იმ ბოროტების მსხვერპლი, რომელსაც ის მხარს უჭერს“- დაწერა ტრამპმა. ოთხშაბათს კი 92 ხმით 7 ის წინააღმდეგ ამერიკის სენატმა მხარი დაუჭირა ირანის წინააღმდეგ ახალ სანქციებს. სანქციების მიზეზად „საერთაშორისო ტერორიზმის მხარდაჭერა“ დასახელდა.

7 ივნისს , თეირანში მომხდარმა ტერაქებმა 13 ადამიანის სიცოცხლე იმსხვერპლა და 40 მდე დაშავდა. პასუხისმგებლობა ტერაქტებზე ISIS-მა აიღო.