ლონდონის ტერაქტი - სკოტლანდ-იარდმა მე-3 ტერორისტის ვინაობაც დაასახელა, ის იტალიის მოქალაქეა

მსოფლიო - 19:51, 06 Jun, 2017

2513

ლონდონის ტერაქტში მონაწილე მესამე თავდამსხმელის ვინაობა ცნობილია, ის იტალიის მოქალაქე, წარმოშობით მაროკოელი 22 წლის იუსუფ ზაგბაა, ამის შესახებ ინფორმაციას ბრიტანეთის პოლიცია ავრცელებს. აქამდე ის ბრიტანეთის სპეცსამსახურების თვალთახედვის არეში არ მოხვედრილა.

როგორც იტალიური მედია Corriere della Sera იტყობინება, ზაგბას დედა ჩრდილოეთ იტალიაში ცხოვრობს, თავად ის კი 1995 წელს მაროკოს ქალაქ ფესში დაიბადა. გამოცემის ინფორმაციით 2016 წელს ის ბოლონიის აეროპორტში დააკავეს, საიდანაც ის სირიაში წასვლას ცდილობდა.

ორი ტერორისტის ვინაობა სკოტლანდ-იარდმა ცოტა ხნის წინ დაასახელა, სკოტლანდ-იარდის განცხადებით ტერორისტები იყვნენ 27 წლის ჰურამ შაზად ბატი და 30 წლის რაშიდ რადუანი. ორივე მათგანი ლონდონის აღმოსავლეთით ბარკინკის რაიონში ცხოვრობდა. სამართალდამცავების ინფორმაციით ჰურამ შაზად ბატი წარმოშობით პაკისტანელია და ბრიტანული პასპორტი ქონდა, ხოლო რაშიდ რადუანის წარმომავლობა ჯერჯერობით გარკვეული არაა, თავად ის თავისთავს მაროკოელს და ლიბიელს უწოდებდა და დაბადების სხვადასხვა თარიღს იყენებდა.

შეგახსენებთ 3 ივნისს, შაბათ საღამოს ლონდონის ცენტრში, დიდი სიჩქარით მოძრავი ფურგონი ტროტუარზე აიჭრა და რამდენიმე ქვეითს დაეჯახა, შემდეგ ფურგონი ხიდზე, „ბორო-მარკეტთან“ ახლოს გაჩერდა, იქიდან გადმოსულმა პირები კი გამვლელებს ცივი იარაღით დაესხნენ თავს. პოლიციელების თქმით თავდამსხმელი 3 იყო და ყველა მათგანი შემთხვევის ადგილზევე იქნა მოკლული. ტერაქტზე პასუხისმგებლობა ე.წ „ისლამურმა სახელმწიფომ’ აიღო. ინფორმაცია ამის შესახებ ISIS-მა მათთან დაკავშირებულ საინფორმაციო სააგენტო „ამაკზე“ გაავრცელეს.