მოსკოვის მერია ნავალნის ტვერის ქუჩაზე აქციის ჩატარების უფლებას არ აძლევს

მსოფლიო - 13:24, 01 Jun, 2017

1485

მოსკოვის მერიამ ალეკსეი ნავალნის 12 ივნისს ტვერის ქუჩაზე აქციის ჩატარებაზე უარი უთხრა. რუს ოპოზიციონერს ალტერნატივად სახაროვის პროსპექტს ან ქალაქის სამხრეთ აღმოსავლეთ ნაწილს სთავაზობენ, მიზეზად აღნიშნულ ქუჩაზე „რუსეთის დღესთან“ დაკავშირებით უკვე დაგეგმილი ღონისძიებები დასახელდა. ნავალნის შტაბში ალტერნატიულ შეთავაზებებზე ჯერ პასუხი არ გაუციათ.

ალეკსეი ნავალნი 12 ივნისს კორუფციის წინააღმდეგ მიმართული აქციის ჩატარებას გეგმავს, აქციაზე შეკრებილი ხალხი, ხელისუფლების მაღალ ეშელნებში არსებულ კორუფციულ ფაქტებს გააპროტესტებს და მათ გამოძიებას მოითხოვს. აქციის ორგანიზატორები აქციაზე 15 ათასამდე ადამიანს ელოდებიან.

10 მაისს რუსეთის პრეზიდენტმა ვლადიმირ პუტინმა ხელი მოაწერა პრძანებას, რომლის თანახმადაც რუსეთის კონფედერაციის თასისა და მსოფლიო ჩემპიონატის უსაფრთხოების დამატებითი ზომების გამო 2017 წლის 1 ივნისიდან 12 ივლისამდე და 2018 წლის 25 მაისიდან 25 ივლისამდე მიტინგების ჩატარება იზღუდება. ყველა მიტინგი, მსვლელობა თუ დემონსტრაცია, რომელიც არ არის სპორტულ ღონისძიებასთან დაკავშირებული, რუსეთის უშიშროების სამსახურთან შეთანხმებით უნდა ჩატარდეს.