მოდელი აცხადებს, რომ ის Hyundai-მ სამსახურიდან მენსტრუაციის გამო გაუშვა

მსოფლიო - 12:23, 01 Jun, 2017

35868

მოდელი რეიჩელ რიკერტი კომპანია Hyundai-ს უჩივის, მისი თქმით კომპანიამ სამსახურიდან მენსტრუაციის გამო გაუშვა.

27 წლის მოდელის განცხადებით აპრილში, ნიუ-იორკში მოწყობილი ავტოშოუს დროს მან საპირფარეშოში გასვლა მოითხოვა, თუმცა დიდი რაოდენობის ვიზიტორების გამო მას ამაზე უარი უთხრეს. შედეგად მან ტამპონის დროულად გამოცვლა ვერ მოასწრო, რის გამოც მას მთლიანად საცვლის და კოლჰოტის გამოცვლა მოუწია, რაზეც მან თავის აგენტს აცნობა. BBC-სთან ინტერვიუში მოდელი აცხადებს, რომ ავტოკკონცერნის წარმომადგენლებმა მას მომდევნო დღეს დასვენება შესთავაზეს, მაგრამ მას არ სურდა საათობრივი ანაზღაურება დაეკარგა და სამუშაოდ მაინც გავიდა. თუმცა მას დაუკავშირდა თავისი აგენტი და აცნობა, რომ Hyundai-ს აღარ სურს მასთან თანამშრომლობის გაგრძელება, „იმის გამო, რომ მას მენსტრუაცია აქვს“.

„მე გაოგნებული და ძალიან გაბრაზებული ვიყავი. ვტიროდი. მე ხომ ამ შოუში მონაწილეობის გამო სხვა შემოთავაზებებზე ვთქვი უარი. განცდა იყო- რა? ეს შეუძლებელია!“- აცხადებს რეიჩელი.

მოგვიანებით მან საჩივარი შეიტანა აშშ-ის დასაქმების უფლებადამცველ კომისიაში. მოდელი, რომელსაც 50-მდე მსგავს გამოფენაში აქვს მონაწილეობა მიღებული აცხადებს, რომ ავტოკონცერნის ქმედებების გამო თავს შერცხვენილად გრძნობს.

Hyundai Motor-ის ამერიკული ფილიალმა ინციდენტის გამოძიების პირობა დადო.