პანამელი დიქტატორი მანუელ ანტონიო ნორიეგა გარდაიცვალა

მსოფლიო - 12:53, 30 May, 2017

2277

პანამის ხელისუფლებამ, ქვეყნის ყოფილი დიქტატორის მანუელ ანტონიო ნორიეგას გარდაცვალების შესახებ განაცხადა.

83 წლის ნორიეგა სიცოცხლის ბოლო წუთებამდე შიდა პატიმრობაში იმყოფებოდა, სადაც მისი მმართველობის დროს ჩადენილი დანაშაულისთვის იხდიდა სასჯელს, რაც პოლიტიკური ოპონენტების მკვლელობაში, კორიფციასა და ძალაუფლების ბოროტად გამოყენებას ითვალისწინებს.

როგორც სააგენტო ფრანს პრესი იტყობინება, მას ცოტა ხნის წინ ტვინის სიმსივნის ოპერაცია ჩაუტარდა.

ყოფილი დიქტატორი , რომელიც პანამის ხელისუფლებაში 1983 წელს მოვიდა, თავდაპირველად კომუნიზმთან ბრძოლაში აშშ-ის მოკავშირედ განიხილებოდა, თუმცა 1980-იან წლების ბოლოს ქვეყანა ნარკოდილერების მფარველად გადააქცია, სასტიკი ბრძოლა გამოუცხადა ოპოზიციას, აპატიმრებდა და აწამებდა ოპოზიციის წარმომადგენლებსა და მათი ოჯახის წევრებს.

1989 წლის დეკემბერში, ნორიეგას დიქტატურული რეჟიმის დასამხობად ამერიკის ჯარები პანამაში შევიდნენ და ნორიეგა დააპატიმრეს, სამ წელში კი ფლორიდის სასამარლომ 30 წლით თავისუფლების აღკვეთა მიუსაჯა.

2008 წელს ნორიეგა ვადაზე ადრე გაათავისუფლეს, თუმცა საფრანგეთში ექსტრადირების მოლოდინში, ციხეში დარჩენა მოუწია.

საქმე იმაშია, რომ 1999 წელს, საფრანგეთის სასამართლომ დაუსწრებლად მიუსაჯა 10-წლიანი პატიმრობა ნარკოტრეფიკინგისა და ფულის გათეთრების ბრალდებით.

საფრანგეთში ექსტრადირების შემდეგ, 2011 წელს, ნორიეგას ექსტრადირების მოთხოვნით საფრანგეთს პანამის ხელისფლებამ მიმართა.

ნორიეგა პანამაში 2011 წელს დაბრუნდა.

საკუთარმა ქვეყნის სასამართლომ, ჯერ კიდევ 1995 წელს, დაუსწრებლად მიუსაჯა 20 წლიანი პატიმრობა პოლიტიკური მოტივით განხორციელებული მკვლელობების გამო.