BBC-ის ცნობით, British Airways ლონდონის საერთაშორისო აეროპორტებიდან რეისებს 28 მაისს განაახლებს. ავიაკომპანიაში აცხადებენ, რომ შეფერხებები შესაძლოა ისევ იყოს, რადგან კომპიუტერული სისტემის აღდგენაზე მუშაობა კვლავ გრძელდება.

27 მაისს, კომპიუტერული სისტემის პრობლემების გამო British Airways-მა რეისები მთელი დღით გადადო.

ავიაკომპანიაში მგზავრებს შექმნილი დისკომფორტისთვის ბოდიში მოუხადეს და განაცხადეს, რომ ზარალს აანაზღაურებენ, ასევე დაეხმარებიან მგზავრებს სხვა რეისებზე რეგისტრაციაში. ავიაკომპანიაში კლიენტებს ურჩევენ, აეროპორტში წასვლამდე, მათ ვებგვერდზე შეამოწმონ ინფორმაცია რეისების შესახებ.

British Airways-ში განაცხადეს, რომ კომპიუტერული სისტემის გაუმართაობა ტექნიკური მიზეზებით იყო გამოწვეული და კიბერთავდასხმასთან კავშირი არ აქვს.