აღნიშნულთან დაკავშირებით "მოქალაქეების საინიციატივო ჯგუფმა" განცხადება გაავრცელა, რომელსაც " ნიუპოსტი" უცვლელად გთავაზობთ:

"ნიგვზიანისა და წინწყაროს ინციდენტების შემდეგ, ახლა უკვე დედოფლისწყაროს მუნიციპალიტეტის სოფელ სამთაწყაროში ირღვევა მუსლიმების ტრადიციული პარასკევის ლოცვის უფლება.

გასულ პარასკევს, სამთაწყაროში მუსლიმთა ტრადიციული ლოცვა კვლავ არ შედგა. სამლოცველოში, რომლის მახლობლადაც ადგილობრივი ქრისტიანი მოსახლეობის ნაწილი შეიკრიბა, მუსლიმები სალოცავად არ გამოცხადდნენ, რაც მნიშვნელოვანწილად განპირობებული იყო სოფლის ქრისტიანი მოსახლეობის უკიდურესად ნეგატიური განწყობებით და იმ ქმედებებით, რომელსაც უკანასკნელი სამი კვირის მანძილზე მათი მხრიდან ჰქონდა ადგილი (მათ შორის, სოფლის ქრისტიანი მოსახლეობის მიერ მუსლიმების სალოცავიდან იძულებით გაყვანა, სოფელში შესასვლელი გზის გადაკეტვა და სხვა ქმედებები). ამას ემატება ადგილობრივი ხელისუფლების მონაწილეობა მუსლიმთათვის ლოცვის ხელშეშლაში
და მოსახლეობის უმრავლესობის ნებისადმი გამოხატული მხარდაჭერა, რაც ხელს უწყობს დისკრიმინაციული პრაქტიკის გაგრძელებას.

რელიგიის თავისუფლება პირველ რიგში გულისხმობს რელიგიური რიტუალების თავისუფლად შესრულების უფლებას, როგორც ინდივიდუალურად, ისე კოლექტიურად, შინ თუ სპეციალურად ამისათვის განკუთვნილ ადგილებში. შესაბამისად, სამთაწყაროში მუსლიმებს ხელი არ უნდა შეეშალოთ ტრადიციული ლოცვის შესრულებაში, სახელმწიფომ კი მათი უფლებების დარღვევის ფაქტებზე სათანადო რეაგირება უნდა მოხადინოს.

აქციის მიზანია, სოლიდარობა გამოვუცხადოთ საქართველოს მოქალაქე მუსლიმებს და სახელმწიფოს მოვთხოვოთ მათი კონსტიტუციური უფლებების უზრუნველყოფა.

საქართველოს კონსტიტუციის მე-19 მუხლის მიხედვით:
1. ყოველ ადამიანს აქვს სიტყვის, აზრის, სინდისის, აღმსარებლობისა და რწმენის თავისუფლება.
2. დაუშვებელია ადამიანის დევნა სიტყვის, აზრის, აღმსარებლობის ან რწმენის გამო, აგრეთვე მისი იძულება გამოთქვას თავისი შეხედულება მათ შესახებ.
3. დაუშვებელია ამ მუხლში ჩამოთვლილ თავისუფლებათა შეზღუდვა, თუ მათი გამოვლინება არ ლახავს სხვათა უფლებებს".- ნათქვამია განცხადებაში.