მანჩესტერ არენაზე მომხდარი თავდასხმის შემდეგ უსაფრთხოების ზომები გამკაცრებულია. საფეხბურთო კლუბის მანჩესტერ იუნაიტედის მრწვთნელისა და ფეხბურთელების ავტომობილები სპეციალისტებმა შესაბამისი პროტოკოლის გათვალისწინებით დაათვალიერეს. ასევე მოხდა კლუბის კუთვნილი ავტობუსის შემოწმება, რომლითაც ფეხბურთელები გადაადგილდებიან.

მანჩესტერ იუნაიტედის ფეხბურთელებმა დღეს, ვარჯიშის დაწყებამდე მომხდარი თავდასხმის შედეგად გარდაცვლილებს წუთიერი დუმილით პატივი მიაგეს.

მანჩესტერ არენაზე პოპ მომღერალ არიანა გრანდეს კონცერტზე აფეთქება გუშინ ღამე მოხდა, რასაც ამჟამინდელი მონაცემებით 22 ადამიანი ემსხვერპლა, მათ შორის არიან ბავშვები, დაშავებულთა რიცხვი კი 59-ს შეადგენს. მომხდარს სამართალდამცველები შესაძლო ტერორისტულ თავდასხმად განიხილავენ. ამჟამად სამართალდამცავები მუშაობენ, ჰყავდა თუ არა მას თანამზრახველები და ჰქონდა თუ არა კავშირი რომელიმე ტერორისტულ ორგანიზაციასთან.

ფოტომასალა: The Sun