ირანის იზოლაცია - ტრამპის რეალური საგარეო პოლიტიკა თუ საუდის არაბეთის გულის მოსაგები განცხადება

მსოფლიო - 12:44, 22 May, 2017

2715

საუდის არაბეთში ქალაქ ერ-რიადში არაბულ-ამერიკულ სამიტზე სიტყვით გამოსვლისას აშშ-ის პრეზიდენტმა დონალდ ტრამპმა სამიტზე დამსწრე მუსლიმურ ქვეყნებს ირანის იზოლაციისკენ მოუწოდა. მან თეირანი რელიგიათაშორის კონფლიქტის გაღვივებასა და ტერორიზმის მხარდაჭერაში დაადანაშაულა.

„ლიბანში, ერაყში, იემენში, ირანის თანხები და იარაღი მოძრაობს, ის ტერორისტების წვრთნის. რაც იწვევს ნგრევას და ქაოსს მთელ რეგიონში“- განაცხადა ტრამპმა.

აღნიშნული განცხადება სოციალურ ქსელში კრიტიკის საგანი გახდა, პოლიტიკოსებმა და უბრალო მოქალაქეებმა ტრამპს შეახსენეს, რომ ირანში, საუდის არაბეთისგან განსხვავებით, რამდენიმე დღის წინ, დემოკრატიული საპრეზიდენტო არჩევნები ჩატარდა, რომელშიც მონაწილეობის სრული უფლება ქალებსაც ჰქონდათ.

ტრამპის განცხადებას გამოეხმაურა შვედეთის ყოფილი პრემიერ მინისტრი, დიპლომატი და საზოგადო მოღვაწე კარლ ბილდტიც:

„ირანმა ხმა მისცა მსოფლიოსადმი გახსნილობას, ტრამპი კი მსოფლიოს ირანის იზოლაციისკენ მოუწოდებს. ევროპელები კი ირანთან ურთიერთობას ემხრობიან“- დაწერა ბილდტმა ტვიტერზე.

ტვიტერზე გამოეხმაურა ტრამპის განცხადებას ირანის საგარეო საქმეთა მინისტრი ჯავად ზარიფიც, რომელიც ირანსა და დიდ ექვსეულს შორის ბირთვულ პროგრამაზე მიღწეულ შეთანხმებაში ოფიციალურ თეირანს წარმოადგენდა. ზარიფმა ირონიული პოსტი დაწერა, რომელშიც კითხვას სვამს, ტრამპის განცხადება ნამდვილად მისი საგარეო პოლიტიკის ნაწილი იყო, თუ უბრალოდ საუდის არაბეთის „მოწველას“ ემსახურებოდა და მინიშნება ელ რიადსა და ვაშინგტონს შორის დადებულ ხელშეკრულებაზე გააკეთა, რომლის ღირებულებაც 480 მილიარდ დოლარზე მეტია.

„ირანი- ნამდვილი არჩევნებიდან ცოტა ხანში - დემოკრატიისა და ზომიერების ბასტიონიდან @POTUS-ის(პრეზიდენტი ტრამპი) მხრიდან თავდასხმის სამიზნე გახდა. ეს საგარეო პოლიტიკაა თუ საუდის არაბეთის 480 მილიარდი დოლარით მოწველა“- წერს ჯავად ზარიფი ტვიტერზე.