ტრამპი - ტერორიზმთან ბრძოლა არის სიკეთესა და ბოროტებას შორის ბრძოლა და არა რწმენათა შორის ბრძოლა

მსოფლიო - 16:28, 21 May, 2017

1740

აშშ-ს პრეზიდენტის ადმინისტრაციამ გაავრცელა იმ საპროგრამო სიტყვის ნაწყვეტები, რომლითაც 21 მაისს, მოგვიანებით, დონალდ ტრამპი საუდის არაბეთის დედაქალაქიდან მუსულმანურ სამყაროს მიამართავს.

სიტყვის ნაწყვეტების თანახმად, აშშ-ს პრეზიდენტი მოუწოდებს მუსულმანურ სამყაროს, რომ აუცილებელია მათ საერთაშორისო ტერორიზმთან ამერიკის შეერთებულ შტატებისა და მისი დასავლელი მოკავშირეების მხარდამხარ იბრძოლონ, რადგან ეს ბრძოლა არის არა რელიგიურ რწმენათა შორის ბრძოლა, არამედ ბრძოლა სიკეთესა და ბოროტებას შორის.

"ჩვენ შეგვიძლია ეს ბოროტება დავამარცხოთ, თუ სიკეთის ყველა ძალა გაერთიანდება და გაძლიერდება, თუ ყველა თქვენგანი საკუთარ თავზე აიღებს ამ ბრძოლის ტვირთს," - ნათქვამია ტრამპის გამოსვლის ტექსტში.

აშშ-ს პრეზიდენტი ასევე აპირებს აღნიშნოს, რომ აშშ სულაც არ ცდილობს პრობლემები ძალის გამოყენებით გადაწყვიტო და არც რეგიონის ქვეყნები არ უნდა ელოდონ, რომ ეს პრობლემები მათი ძალისხმევის გარეშე გადაწყდება.

"ჩვენი პარტნიორობა უნდა დაეფუძნოს უსაფრთხოებას, რომელიც სტაბილურობით მიიღწევა და არა რადიკალურ ქმედებებსა და ნგრევას. იქ სადაც ეს მოხერხდება, ჩვენ განვახორციელებთ თანმიმდევრულ რეფორმებს და არა უცაბედ ჩარევებს," - აცხადებს ტრამპი.

ტრამპი ასევე მოუწოდებს მუსულმანურ ქვეყნებს, რომ ებრძოლონ სხვადასხვა სახის დისკრიმინაციას, რადგან ექსტრემიზმი, ტერორიზმი სწორედ ამ სახის სულისკვეთებას ეფუძნება, რასაც შემდგომში უდანაშაულო მუსულმანების, ქალების, ებრაელებისა და ქრისტიანების დაჩაგვრა და დახოცვა მოსდევს.