„ნიუპოსტის“ მთავარ რედაქტორს ლაშა ბერულავას სტატიასთან დაკავშირებით დაკითხავენ

საზოგადოება - 19:55, 11 Jun, 2013

2610

ლაშა ბერულავა გამორიცხავს, რომ დაკითხვაზე დაბარება რაიმე ფორმით უკავშირდება მის საზოგადოებრივ აქტივობასა და პოლიტიკურ ორიენტაციას. მისივე თქმით, დაკითხვაზე დაბარებას არ განიხილავს, როგორც პროფესიულ საქმიანობაში ხელის შეშლას და აცხადებს, რომ სამართალდამცავების ამგვარ აქტიურობას მედიაში გამოქვეყნებულ მასალებთან დაკავშირებით მხოლოდ მიესალმება:

"დამიკავშირდა გამომძიებელი, რომელსაც დავუდასტურე, რომ 22 მაისს "ნიუპოსტზე" გამოქვეყნებული და რადიო "აფხაზეთის ხმის" ეთერში გასული ინფორმაციის ავტორი მე გახლდით, რის შემდეგაც დაკითხვაზე დამიბარა. ძალიან თავაზიანად მესაუბრა, როცა ვუთხარი, რომ დატვირთული სამუშაო გრაფიკი მაქვს, დროის შერჩევაც კი მე შემომთავაზა. საქმე ეხება ინფორმაციას სათაურით: "მარჯანიშვილის ქუჩაზე ბიჭს "სხვანაირი ქცევის გამო" სასტიკად გაუსწორდნენ". როგორც გამომძიებელმა მითხრა, საქმეს იძიებენ და დამატებითი დეტალები აინტერესებთ. მზად ვარ, ყველაფერი ვუთხრა გამოძიებას, რაც ამ ფაქტზე ვიცი. ბევრი ადამიანი შეშფოთებულია, რომლებთანაც ინფორმაციამ არასრულად, ფრაგმენტულად მიაღწია და მხოლოდ ის გაიგეს, რომ დაკითხვაზე დამიბარეს. საგანგაშო არაფერია, მხოლოდ მოხარული ვიქნები, თუ მედიაში გამოქვეყნებულ მასალებს სამართალდამცველები ყურადღებით მოეკიდებიან", - ამბობს ლაშა ბერულავა.

"ნიუპოსტი აქვე სრული სახით გთავაზობთ იმ ინფორმაციას, რომელიც სააგენტომ 22 მაისს გამოაქვეყნა და რის გამოც ლაშა ბერულავას ხვალ დაკითხავენ:

მარჯანიშვილის ქუჩაზე ბიჭს "სხვანაირი ქცევის გამო" სასტიკად გაუსწორდნენ

11:09 22.05.2013

მარჯანიშვილის ქუჩაზე მდებარე რუსულ ეკლესიასთან გუშინ, დაახლოებით 23.00 საათზე სამი მამაკაცი სასტიკად გაუსწორდა 20-22 წლის ბიჭს. სავარაუდოდ, გამვლელის მიმართ გამოჩენილი აგრესია მისმა ჩაცმულობამ და სიარულის მანერამ გამოიწვია.

როგორც "აფხაზეთის ხმას" მარჯანიშვილის ქუჩაზე მდებარე ერთ-ერთი მაღაზიის გამყიდველმა უთხრა, ტროტუარზე დაგდებულ ბიჭს სამი ბიჭი წიხლებს ურტყამდა და "პიდარასტს" უძახდა:

"მე გამოვედი და ყვირილი დავიწყე, რას შვრებით, შვილებო, მასე ხომ მოკვდება-მეთქი. სულ სისხლში იყო ამოთხვრილი და კვნესოდა, ესენი კი ფეხებს ურტყამდნენ დაუნდობლად. ვეხვეწე - არ მოკლათ, ცოდოა-მეთქი და ერთი მომიბრუნდა: ამათ ყოველდღე ასე უნდა ურტყა, ცოტა აზრზე რომ მოვიდნენო. იქ ხომ ვიწრო ქუჩაა და მანქანები ნელა მოძრაობდნენ, გამოვარიდე საცოდავი ბიჭი და ერთ ტაქსში ჩავსვი, რამდენიმე გამვლელიც გამოჩნდა, რომელმაც ჩემი მხარე დაიკავა და თავდამსხმელებს შეუტია", - ამბობს ქალი, რომელმაც ვინაობის დასახელება არ ისურვა.

ინფორმაცია მარჯანიშვილის ქუჩაზე მომხდარი თავდასხმის შესახებ სოციალურ ქსელში "იდენტობის" წარმომადგენელმა ირაკლი ვაჭარაძემაც გაავრცელა. მისი თქმით, ასეთი შემთხვევები თბილისში გახშირებულია.

თბილისში 17 მაისის შემდეგ გამოვლენილი რამდენიმე მსგავსი შინაარსის თავდასხმის შესახებ სახალხო დამცველის განცხადებაშიცაა აღნიშნული, სადაც უჩა ნანუაშვილი 17 მაისს მომხდარი ფაქტების გამოძიების გაგრძელებას ითხოვს:

"როგორც გამოკითხული პირები აცხადებენ, საქართველოს სახალხო დამცველის რწმუნებულებთან, 17 მაისიდან დღემდე ადგილი აქვს მათ მიმართ სხვადასხვა კანონსაწინააღმდეგო ქმედებებს. კერძოდ, მათი განმარტებით, ადგილი აქვს განსხვავებული გარეგნობის და შეხედულებების გამო მათ დევნას, ფიზიკურ და ვერბალურ შეურაცხყოფას, ძალადობასა და მუქარას (თმაზე ცეცხლის წაკიდება, ქვების სროლა, საზოგადოებრივ ტრანსპორტში შევიწროვება, ორგანიზაციის ოფისში შეჭრის მცდელობა, ინდივიდუალური საცხოვრებელი მისამართების გარკვევა სავარაუდო ანგარიშსწორებისათვის ა.შ.).

რამდენიმე პირი ასევე აღნიშნავს, რომ ქუჩასა თუ საზოგადოებრივ ტრანსპორტში გადაადგილებაც მომეტებული საფრთხის შემცველია. ზოგიერთმა მათგანმა შეიცვალა საცხოვრებელი სახლიც, ვინაიდან დაცული არ არის მათი უსაფრთხოება. თითოეული მათგანი, აღნიშნულ ქმედებებს მათ 17 მაისის აქციაში მონაწილეობასა და კონკრეტულ ლგბტ ჯგუფთან გაიგივებას უკავშირებს", - აღნიშნულია სახალხო დამცველის განცხადებაში.