ტრამპსა და ერდოღანს შორის მთავარი წინააღმდეგობა სირიელი ქურთების შეიარაღების საკითხმა გამოიწვია

მსოფლიო - 14:09, 17 May, 2017

2388

ვაშინგტონში აშშ-ს პრეზიდენტ დონალდ ტრამპსა და თურქეთის პრეზიდენტ რეჯეპ ტაიპ ერდოღანს შორის გამართულ შეხვედრაზე, მხარეთა შორის მოლაპარაკების მთავარი საკითხი ტერორიზმისა და ახლო აღმოსავლეთში არსებული საერთო საფრთხეების წინააღმდეგ ბრძოლა იყო. საერთო პრესკონფერენციაზე დონალდ ტრამპმა განაცხადა, რომ ის მომავალშიც დაუჭერს მხარს თურქეთს ტერორიზმის წინააღმდეგ ბრძოლაში.

ორივე მხარემ აღნიშნა, რომ შეხვედრამ ორ ქვეყანას შორის მეგობრული ურთიერთობების გაღრმავებას შეუწყო ხელი. თუმცა, ერთობლივ პრესკონფერენციაზე დაფიქსირდა საკითხი, რომელშიც მხარეები ვერ თანხმდებიან.

ერდოღანის განცხადებით, თურქეთი არასდროს მიიღებს დადებითად აშშ-ს მიერ სირიაში თურქი ამბოხებულების შეიარაღებისა და დახმარების საკითხს. მას მიაჩნია, რომ ქურთთა ორგანიზაცია, რომელიც "სირიის დემოკრატიული ძალების" კოალიციაში შედის და "ისლამური სახელმწიფოს" წინააღმდეგ იბრძვის, "ქურთისტანის მუშათა პარტიის" ნაწილს წარმოადგენს. შეგახსენებთ, რომ "მუშათა პარტია" თურქეთში, აშშ-ში, ბრიტანეთსა და მსოფლიოს სხვა ქვეყნებში ტერორისტულ ორგანიზაციადაა მიჩნეული.

საპირისპირო პოზიცია აქვს ამერიკის ადმინიტრაციას, რომელიც, სირიაში მებრძოლ ქურთებს ტერორისტებად არ მიიჩნევს და 9 მაისს ტრამპმა თანხმობა განაცხადა მათთვის იარაღისა და საბრძოლო მასალების მიწოდებაზე.