სახელმწიფო ინსტიტუტები ჩართული არიან ერთ-ერთი ავაზაკის ქმედებების გაპრავებაში- მთავარი აუდიტორი

პოზიცია - 14:32, 15 May, 2017

2475

აუდიტის სამსახურის უფროსი ეჭვოვობს, რომ ოთარ ფარცხალაძე და პროკურატურა შეთანხმებულად მოქმედებენ.

ლაშა თორდიას თქმით, მას "ვერც ფინანსური პოლიცია და ვერც პროკურატურა" ვერ შეაშინებს.

"გამიჩნდა დიდი ეჭვი, რომ მოქალაქე ოთარ ფარცხალაძე და მთავარი პროკურატურა შეთანხმებულად მოქმედებენ. ამას ემატება ის გარემოება, რასაც ვუყურებ სოციალური ქსელებისა და ტელევიზიის საშუალებით, როდესაც მის სახლში მობილიზებულია ფინანსური პოლიცია, შსს-ს მაღალჩინოსნები, ადამიანები, რომლებიც ღამის 2-3 საათზე მის სახლთან იკრიბებიან. დარწმუნებული ვარ, რომ ამ დღეებში ჩემი მისამართით არა ერთი ბრალდება გაიჟღერებს, შეიძლება ვიდეოებიც გავრცელდეს, ყველაფრისთვის მზად ვარ. ვერ შემაშინებს ვერც ფინანსური პოლიცია, ვერც პროკურატურა"- განაცხადა ლაშა თორდიამ.

მისი თქმით, გული წყდება, რომ "სახელმწიფო ინსტიტუტები ჩართულები არიან ერთ-ერთი ავაზაკის ქმედებების "გაპრავებაში".

"სამარცხვინოა, რომ თურმე ოთარ ფარცხალაძე იმყოფებოდა დაწესებულებაში, სადაც წიგნს კითხულობდა, მე ვქეიფობდი, ვღრეობდი. ალბათ, დაამატებენ სამაგონს ვსვამდი ან რაღაც მსგავსს, მივუვარდი ფარცხალაძეს, რომ მეც წამეკითხა როგორ კითხულობდა წიგნს. ამ წერილის დამწერის ნიჭიერებასაც ხაზს უსვამს. ამ წერილს ოთარ ფარცხალაძე ვერ დაწერდა, ამ წერილის დამწერს მოვუწოდებდი, რომ ცოტა უფრო მეტი მხატვრული გარემოებები შეიტანოს, რომ ადამიანებისთვის შთაგონება უფრო მეტი იყოს,“- განაცხადა ლაშა თორდიამ.

აუდიტის სამსახურის უფროსი საავადმყოფოდან დღეს გამოწერეს. ის მკურნალობას სახლში გააგრძელებს.

თორდიას ფიზიკურად 12 მაისს გაუსწორდნენ. შემთხვევა თბილისში, შარდენის ქუჩაზე მდებარე ერთ-ერთ ღამის კლუბში მოხდა.

თორდიას მტკიცებით, მას ყოფილი მთავარი პროკურორი, ოთარ ფარცხალაძე დაესხა თავს.