იემენში ქოლერას 115 ადამიანი ემსხვერპლა - სანაში საგანგებო მდგომარეობა გამოცხადდა

მსოფლიო - 12:19, 15 May, 2017

2419

იემენის დედაქალაქ სანაში, რომელიც ჰუსიტი-მეამბოხეების კონტროლქვეშ იმყოფება, საგანგებო მდგომარეობა გამოცხადდა. მიზეზი, ქოლერას ეპიდემიაა.

იემენის ჯანდაცვის სამინისტრო საერთაშორისო ჰუმანიტარულ ორგანიზაციებს, ეპიდემიასთან ბრძოლაში დასახმარებლად მოუწოდებს.

აღსანიშნავია, რომ ქვეყნის ჯანდაცვის სისტემა, საომარი მოქმედებების გამო ძლიერად დაზიანდა და ეპიდემიასთან გამკლავება არ შეუძლია.

წითელი ჯვრის ინფორმაციით, იემენში ქოლერას უკვე 115 ადამიანი ემსხვერპლა. ასობით საავადმყოფო არ მუშაობს. შეიარაღებული კონფლიქტის გამო ადგილზე ვერ ჩადიან ჰუმანიტარული ორგანიზაციებიც.
შეგახსენებთ, მას შემდეგ, რაც 2011 წელს იემენში ხელისუფლება შეიცვალა, ქვეყანა პოლიტიკურ კრიზისში იმყოფება.

შეიარაღებული კონფლიქტი მიმდინარეობს ამჟამად. ყოფილი პრეზიდენტი, სალეჰი, ანტისამთავრობო გამოსვლების გამო გადადგა. სწორედ მას უჭერენ ამბოხებული ჰუსიტები მხარს.

ამბოხებულებმა სექტემბერში დედაქალაქ სანაას დაკავება შეძლეს. მოქმედი პრეზიდენტი, მანსურ ჰადი იძულებული გახდა ქალაქ ადენში გადასულიყო და ის ქვეყნის დროებით დედაქალაქად გამოეცხადებინა.

იემენის ხელისუფლებას არაბულმა ქვეყნებმა მხარდაჭერა გამოუცხადეს. კოალიციას საუდის არაბეთი ხელმძღვანელობს, რომელიც აცხადებს, რომ აჯანყებულების წინააღმდეგ სამხედრო მოქმედებებს მანამ არ შეწყვეტს, სანამ ამბოხებულები იარაღს არ დაყრიან.

იემენის ხელისუფლება და საუდის არაბეთი ჰუსიტების მფარველობაში ირანს ადანაშაულებენ.