საფრანგეთში ძალიან გამხდარ მოდელებს პოდიუმზე გასვლა ოფიციალურად აეკრძალათ

მსოფლიო - 17:32, 06 May, 2017

6296

საფრანგეთში ძალაში შევიდა კანონი, რომლის მიხედვითაც ზედმეტად გამხდარი მოდელების პოდიუმზე გამოსვლა და სარეკლამო რგოლებში მონაწილეობა იკრძალება.

საფრანგეთის ჯანდაცვის მინისტრის, მარისოლ ტურენის განცხადებით, აღნიშნული კანონპროექტი მოდელებისა და ზოგადად ახალგაზრდა ქალების სიგამხდრისკენ მიდრეკილებით არის ნაკარნახევი.

მისი თქმით, სილამაზის არაბუნებრივი და არარეალური სტანდარტები ბევრს მათგანს არასრულფასოვნების კომპექსს უქმნის, რაც თავის მხრივ ქრონიკულ შიმშილობას იწვევს.

ახალი კანონის თანახმად, დასაქმებისას მოდელმა უნდა წარმოადგინოს ექიმის ცნობა ჯანმრთელობის მდგომარეობის, მათ შორის სხეულის მასის ინდექსის შესახებ, რითაც დადგინდება არის თუ არა დარღვევა სიმაღლისა და წონის თანაფარდობას შორის.

კანონის დარღვევის შემთხვევაში, დამსაქმებელს 75 000 ევრომდე ჯარიმის გადახდა ან 6 თვით თავისუფლების აღკვეთა ემუქრება.

2015 წელს, როდესაც კანონპროექტის პირველი ვერსია პარლამენტში შეიტანეს, მოდელებისთვის სხეულის მასის ინდექსის მინიმალური მაჩვენებელი იყო განსაზღვრული, რასაც სამოდელო სააგენტოების პროტესტი მოჰყვა. რის შემდეგაც, ექიმებს უფლება მიეცათ, თავად გადაწყვიტონ, არის თუ არა მოდელის წონა ჯანმრთელობისთვის სახიფათო.

პირველი ოქტომბრიდან ასევე ამოქმედდება ფოტოსესიებთან დაკავშირებული წესდებაც. გრაფიკულად დამუშავებულ ფოტოებს თან უნდა დაერთოს მითითება - „ფოტოები დამუშავებულია.”

ექიმების განცხადებით, 30 000-ზე მეტი ფრანგი ანორექსიით არის დაავადებული, მათგან 90% ახალგაზდა ქალია.