გიორგი მარგველაშვილი ამბობს, რომ უმრავლესობისგან შეთავაზებას მოისმენს და გადაწყვეტილებას ამის შემდეგ გაასაჯაროებს.

საპარლამენტო უმრავლესობამ პრეზიდენტს საკონსტიტუციო ცვლილებების საყოველთაო განხილვებში მონაწილეობა უკვე შესთავაზა.

მამუკა მდინარაძე "ნიუპოსტთან" საუბრისას აკონკრეტებს, რომ "შეთავაზება უშუალოდ პრეზიდენტს ეკუთვნის".

რამდენად არის შესაძლებელი კონსტიტუცის ცვლილებები პრეზიდენტმა და პარლამენტის თავმჯდომარემ ერად განუმარტონ მოსახლეობას, მაშინ როცა სწორედ აღნიშნული ცვლელებები გახდა მარგველაშვილსა და კობახიძეს შორის დაპირისპირების მთავარი მიზეზი.

პოლიტილოგი გია ხუხაშვილი თემის შეფასებისას ამბობს, რომ პარლამენტის თავმჯდომარემ პრეზიდენტთან ურთიერთობა ბოდიშის მოხდით უნდა დაიწყოს.

"ხელისუფლების განცხადებები ძალიან სასაცილო და ურთიერთგამომრიცხავია. ჯერ კიდევ დილით აცხადებდნენ, რომ როგორ წარმოუდგენია პრეზიდენტს საკონსტიტუციო ცვლილებების საყოველთაო განხილვებში მონაწილეობის მიღებაო, შემდეგ რამდენიმე საათში 180 გრადუსით შემოტრიალდნან და თავისივე განცხადებების უარყოფას ახდენენ. ძალიან არეულები და აჭრილები არიან"- აღნიშნა ხუხაშვილმა.

პოლიტოლოგი საკონსტიტუციო ცვლილებების განხილვის პროცესში დისკუსიას მიესალმება. მისი თქმით, პროცესი პროფესიულ წრეებთან შეხვედრით უნდა დაიწყოს.

"მოსახლეობასთან პარლამენტის თავმჯდომარესთან ერთად სიარული მხოლოდ მაშინ შეიძლება საუბარი, თუ ის მისი საქციელისთვის ბოდიშს მოიხდის. ეს ადამიანი მთელი ეს კვირები შეთქმულების თეორიებს ავითარებდა და პრეზიდენტს კონსტიტუციასთან მიმართებით ლამის სახელმწიფო გადატრიალებაში ადანაშაულებდა. ამ ადამიანმა ჯერ ბოდიში უნდა მოიხადოს ამ განცხადებებისთვის, აღიაროს რომ ისტერიულ კამპანიას ეწეოდა და ამის შემდეგ საუბარი ყველაფერზე შეიძლება.

პარლამენტის თავმჯდომარესთან მიმართებით პრინციპი - პატარა ბავშვს ყველაფერი ეპატიება არ მოქმედებს. ფეხების ბაკუნი ეპატიებათ ბავშვებს, ის არ არის ბავშვი, ამიტომ თავის საქციელისთვის ბოდიში უნდა მოიხადოს. მან პრეზიდენტთან კომუნიკაცია ბოდიშის მოხდის შემდეგ უნდა ააწყოს. ადამიანური ურთიერთობის აღდგენის შემდეგ ყველაფერზე საუბარი შეიძლება მათ შორის ერთობლივად შეხვდნენ მოსახლეობას და საკონსტიტუციო ცვლილებების საყოველთაო განხილვებში ორივემ თავისი პოზიცაია დააფიქსიროს"- უთხრა "ნიუპოსტს" გია ხუხაშვილმა.