ამერიკის შეერთებული შტატებისა და რუსეთის ფედერაციის პრეზიდენტები შეთანხმდნენ სირიაში ცეცხლის შეწყვეტის შეთანხმებას მიაღწიონ, რათა შეაჩერონ ქვეყანაში მიმდინარე ომი.

დონალდ ტრამპსა და ვლადიმირ პუტინს შორის სატელეფონო საუბარი მას შემდეგ, რაც აშშ-მა სირიაზე სამხედრო იერიში განახორციელა, გუშინ პირველად შედგა. აღნიშნულის შესახებ თეთრმა სახლმა და კრემლმა შესაბამისი განცხადებები გაავრცელეს.

როგორც განცხადებებიდან ხდება ცნობილი, პრეზიდენტებმა სირიის გარდა კიდევ რამდენიმე თემა განიხილეს, მათ შორის ჩრდილოეთ კორეა და ვადები თუ როდის შეხვდებიან ისინი პირისპირ.

თეთრი სახლის განცხადებაში ნათქვამია: „პრეზიდენტი ტრამპი და პრეზიდენტი პუტინი შეთანხმდნენ, რომ სირიის მოვლენები ხანგრძლივ პროცესში გადაიზარდა და აღნიშნეს, რომ ქვეყნებმა ძალისხმევა არ უნდა დაიშურონ, რომ ძალადობას წერტილი დაუსვან. კარგი საუბარი შედგა, რომელმაც მოიცვა უსაფრთხოებისა თუ დეესკალაციების საკითხები, ჰუმანიტარული ზონისთვის მშვიდობიანი გარემოს შესაქმნელად“

კრემლის განცხადებაში კი ნათქვამია, რომ გადაწყდა მოიძებნოს შესაბამისი გზები, რათა მიღწეულ იქნეს ცეცხლის შეწყვეტის რეჟიმის განმტკიცება.

„მიზანი არის ის, რომ შეიქმნას პირობები სირიაში სიტუაციის რეალური რეგულაციისთვის“, - ნათქვამია ოფიციალური მოსკოვის განცხადებაში.

არცერთი უწყების განცხადებაში არ არის ნათქვამი, განიხილეს თუ არა პრეზიდენტებმა შორი რადიუსის რაკეტებით განხორციელებული სამხედრო იერიში.

თეთრი სახლი ასევე აცხადებს, რომ ტრამპმა და პუტინმა ისაუბრეს იმაზე, თუ რა არის საუკეთესო გზა ჩრდილოეთ კორეაში „ძალიან საშიში პროცესის დასარეგულირებლად“.

კრემლის განცხადებაში ნათქვამია, რომ პრეზიდენტებმა ტრამპის არჩევის შემდეგ მათი პირველი ოფიციალური შეხვედრის შესახებ ისაუბრეს, რომელიც G20-ის ფორმატში ჰამბურგში, მიმდინარე წლის ივლისის დასაწყისში შედგება. აღნიშნულზე არაფერია ნათქვამი თეთრი სახლის ოფიციალურ განცხადებაში.