მაკრონის ულტიმატუმი ევროკავშირს: ან რეფორმირება, ან ფრექსიტი

მსოფლიო - 15:23, 01 May, 2017

5438

საფრანგეთის საპრეზიდენტო არჩევნების მეორე ტურში გასული ცენტრისტი კანდიდატი ემანუელ მაკრონი ევროკავშირს აფრთხილებს. მაკრონის თქმით ევროკავშირი ან შეიცვლება, ან ადრე თუ გვიან „ფრექსიტის“ მოწმე გახდება. როგორც მაკრონმა BBC-სთან ინტერვიუში განაცხადა, ის ევროკავშირის საფუძვლიანი რეფორმირების მომხრეა, რადგან „მისი დისფუნქცია არ შეიძლება დიდხანს გაგრძელდეს:

"მე პრო-ევროპელი ვარ, ამ არჩევნების განმავლობაში მე თანმიმდევრულად ვიცავ ევროპულ იდეას და ევროპულ პოლიტიკას, იმიტომ რომ ეს არის ძალიან მნიშვნელოვანი ფრანგებისთვის და გლობალიზაციის პროცესში ჩვენი ქვეყნის კუთვნილი ადგილისთვის“- განაცხადა მაკრონმა.

მაკრონის თქმით, ფრანგები უკმაყოფილოები არიან ევროკავშირის დისფუნქციით და ეს ასე არ შეიძლება გაგრძელდეს. En Marche!-ს ლიდერის თქმით მისი არჩევის შემდეგ , ის დაიწყებს ევროკავშირის ფუნდამენტურ რეფორმირებას. წინააღმდეგ შემთხვევაში თუ ევროკავშირი იმგვარადვე გააგრძელებს ფუნქციონირებას, როგორც დღეს, მაკრონი აცხადებს, რომ ეს ევროპული იდეის ღალატი იქნება და შესაძლოა საფრანგეთის მიერ ევროკავშირის დატოვებაც გამოიწვიოს.

„ხვალ ჩვენ გვექნება ფრექსიტი ან ახალი ეროვნული ფრონტი“- განაცხადა მაკრონმა.