დასავლეთი ჩრდილო კორეის მახლობლად საზღვაო ძალებს აძლიერებს

დასავლეთი ჩრდილო კორეის მახლობლად საზღვაო ძალებს აძლიერებს - "Mistral" იაპონიის პორტში შევიდა

მსოფლიო - 14:15, 29 Apr, 2017

18793

29 აპრილს იაპონიის პორტ სასებოში ღუზა ჩაუშვა ფრანგულმა სადესანტო სამხედრო გემმა Mistral-მა. კორეის კრიზისის ფონზე, ფრანგული ხომალდის იაპონიის სანაპიროებთან ყოფნა კიდევ უფრო რთულ მდგომარეობაში აყენებს ჩინეთშ, რომელიც ისედაც განიცდის აშშ-ს ზეწოლას ჩრდილოეთ კორეის ბირთვული პროგრამის შეცერების საკითხში.

ოფიციალურად, მაისში, Mistral-ი მონაწილეობას მიიღებს გუამთან ახლოს დაგეგმილ სამხედრო წვრთნებში, რომელშიც ასევე ჩაერთვებიან იაპონიის, აშშ-ს, დიდი ბრიტანეთის სამხედრო გემები. წვრთნების მიზანია დესანტის გადასხმა ტინიანის კუნძულზე რომელიც ტოკიოსგან 2500 კილომეტრში მდებარეობს. წვრთნები, ოფიციალური პირების განცხადებით ადრე იყო დაგეგმილი.

Mistral-ის მონაწილეობა წვრთნებში ცხადყოფს, რომ საფრანგეთი ასევე შეშფოთებულია ჩრდილოეთ კორეის ამბიციური გეგმებით, რომელიც ბირთვული იარაღის სრულყოფისა და ავიამზიდების შეძენის სურვილით პრეტენზიას აცხადებს, რომ გააფართოოს თავისი სამხედრო გავლენა რეგიონში. საფრანგეთის შეშფოთება ბუნებრივია, რადგან მის შემადგენლობაში მყოფი წყნარი ოკეანის კუნძულები ახალი კალედონია და ფრანგული პოლინეზია კრიზისის ზონასთან ახლოს მდებარეობენ.

საფრანგეთის თავდაცვის სამინისტროში აცხადებენ, რომ Mistral-ის ყოფნა რეგიონში "ფრანგული დიპლომატიის ძლიერ მხარდაჭერას" წარმოადგენს.

არ არის გასაკვირი, რომ იაპონიაში ფრანგული ხომალდის გამოჩენას სიხარულით შეხვდნენ, რადგან სამხრეთ კორეის შემდეგ, ჩრდილო კორეა ყველაზე აგრესიულად სწორედ იაპონიის მიმართ არის განწყობილი.

შეგახსენებთ, რომ Mistral-ს შეიარღებაში შეიძლება ჰყავდეს 35 სამხედრო ვერტმფრენი, 4 ბარჟა და რამდენიმე ასეული ჯარისკაცი.

ჩრდილო კორეის მიერ ბალისტიკური რაკეტის მორიგი გამოცდის ფონზე, სიტუაცია რეგიონში სულ უფრო და უფრო იძაბება. როგორც ცნობილია, ჩინეთმა უკვე გააძლიერა საკუთარი სამხედრო საზღვაო პოტენციალი, რუსეთმა სამხედრო მზადყოფნაში მოიყვანა საჰაერო თავდაცვითი სისტემები ქვეყნის შორეულ აღმოსავლეთ რეგიონში, ხოლო აშშ-ს, დიდი ბრიტანეთისა და იაპონიის საზღვაო ძალებს დღეიდან ფრანგული Mistral-იც დაემატა.