"ვთხოვთ ყველა კომპეტენტურ სტრუქტურას დაიცვას ეროვნული ავიაცია განადგურებისგან"- "ჯორჯიან ეარვეისი" განცხადებას ავრცელებს

ბიზნესი & ეკონომიკა - 19:39, 28 Apr, 2017

2272

ავიაკომპანია "ჯორჯიან ეარვეისი" განცხადებას ავრცლებს, კომპანიის პრეტენზია საქართველოს აეროპორტების გაერთიანებასთან აქვს, მათი თქმით, საქართველოს აეროპორტების გაერთიანება უცხოურ ავიაკომპანიებს, რომლებიც საკუთარ ქვეყნებში ისედაც სარგებლობენ შეღავათებით, საქართველოშიც მაქსიმალურ შეღავათებს უწესებს, ამის გამო კი „ჯორჯიან ეარვეისს“ არაჯანსაღი კონკურენციის პირობებში უწევს მუშაობა:

მოგეხსენებათ რომ „ჯორჯიან ეარვეისი“ ერთადერთი ქართული ავიაკომპანიაა, რომელიც მსოფლიოს არაერთ ქვეყანაში დაფრინავს და არაერთი ქართველი მფრინავი თუ ავიასპეციალისტი აღზარდა და ეს პროცესი მუდმივად მიმდინარეობს. როდესაც ქართულ ავიაბაზარზე მოღვაწეობენ ისეთი მონსტრი ავიაკომპანიები როგორებიცაა „აეროფლოტი“, „თურქიშ ეარლაინსი“ და ა.შ. და ისინი სწორედ,მათი ქვეყნების მთავრობების პირდაპირი და არაპირდაპირი დაფინანსებით ახერხებენ დემპინგური ფასებით ოპერირებას, ჩვენ მუდმივად გვიხდება მუშაობა არაჯანსაღი კონკურენციის პირობებში. უფრ მეტიც, საქართველოს აეროპორტების გაერთიანება უცხოურ ავიაკომპანიებს, რომლებიც საკუთარ ქვეყნებში ისედაც სარგებლობენ შეღავათებით, საქართველოშიც მაქსიმალურ შეღავათებს უწესებს.

გვსურს შევახსენოთ მათ, რომ „ჯორჯიან ეარვეისი“ არის ქართული ავიაკომპანია, რომელიც 1993 წლიდან ფუნქციონირებს. ამ დროის განმავლობაში ასობით მილიონი ლარი აქვს შეტანილი საქართველოს ბიუჯეტში და ამჟამად, ხუთასზე მეტი კვალიფიციური კადრი ჰყავს დასაქმებული. ჯანსაღი და სამართლიანი კონკურენციის პირობებში კი ქართული ავიაცია უფრო სწრაფად განვითარდება და მეტი ადამიანის დასაქმებას შეძლებს.

ამ ყველაფრის მიუხედავად, „ჯორჯიან ეარვეისი“ კვლავ აგრძელებს ფრენებს ვენის, ამსტერდამის, მოსკოვის, თელ-ავივის მიმართულებით და ამავდროულად, ჩვენი მგზავრების მოთხოვნის საფუძველზე ვამატებთ ახალ მიმართულებებს: ლონდონს, კიევს, პრაღას, პარიზს, ყაზანს და სოჭს.

ჩვენ ყველაფერს ვაკეთებთ იმისთვის, რომ ქართული ავიაცია შენარჩუნდეს და საბოლოოდ არ განადგურდეს.

ვთხოვთ ყველა კომპეტენტურ სტრუქტურას, რომელიც ვალდებულია უზრუნველყოს კონკურენციის სამართლიანი პირობები, დაიცვას ეროვნული ავიაცია განადგურებისგან.“- აღნიშნულია განცხადებაში.