უკრაინის სახელმწიფო "ოსჩადბანკი" ექს-პრეზიდენტ იანუკოვიჩისა და მისი გუნდის ანგარიშებზე არსებული თანხის კონფისკაციას მოახდენს, რაც ჯამში 1,5 მილიარდ დოლარს შეადგენს. კონფისკაციის შემდეგ აღნიშნული თანხა უკრაინის ბიუჯეტში ჩაირიცხება.

უკრაინის ეროვნული უშიშროებისა და თავდაცვის საბჭოს ცნობით, ამის შესახებ გადაწყვეტილება სასამართლომ მიიღო. საბჭოს ხელმძღვანელის, ალექსანდრე ტურჩინოვის განცხადებით, ეს იყო პრინციპული გადაწყვეტილება და ამ თანხებით ქვეყნის თავდაცვისა და უშიშროების სექტორი დაფინანსდება.

შეგახსენებთ, რომ აღნიშნული თანხა უკრაინის ფინანსური მონიტორინგის სახელმწიფო სამსახურმა 2015 წლის იანვარში დააყადაღა, თუმცა, დღემდე მისი კონფისკაცია ვერ მოხერხდა, რადგან ქვეყნის პარლამენტმა "სახელმწიფო მოხელეთა ქონების სპეციალური კონფისკაციის შესახებ კანონის" მიღება ვერ მოახერხა და ამ პროცედურის განხორციელებას სასამართლოს გადაწყვეტილება დასჭირდა.