"სამართლის დანაშაულად აღარ ჩაითვლება საქონლის სასაქონლო ზედნადების გარეშე ტრანსპორტირება"- ქუმსიშვილი

ბიზნესი & ეკონომიკა - 12:37, 26 Apr, 2017

16083

ფინანსთა მინისტრის დიმიტრი ქუმსიშვილის ახალი საკანონმდებლო ცვლილებების პაკეტის პრეზენტაციისას განაცხადა, რომ სასაქონლო ზედნადებთან და არააქციზური საქონლის მარკირებასთან დაკავშირებულ დარღვევებს სისხლის სამართლის პასუხისმგებლობა აღარ შეეხება.
"სისხლის სამართლის დანაშაულად აღარ ჩაითვლება საქონლის სასაქონლო ზედნადების გარეშე ტრანსპორტირება; მყიდველის მოთხოვნისას სასაქონლო ზედნადების გაუცემლობა ან საქონლის შეძენისას ზედნადების მიღებაზე უარი - თუ საქონლის ღირებულების თანხა აღემატება 10 000 ლარს; აგრეთვე, სისხლის სამართალი აღარ გავრცელდება ისეთ სამართალდარღვევებზე, როგორებიცაა არააქციზური საქონლის მარკირების ნიშნის გარეშე გამოშვება, შენახვა, რეალიზაცია ან გადაზიდვა - თუ არააქციზური საქონლის ღირებულება აღემატება 2000 ლარს.

როგორც დიმიტრი ქუმსიშვილმა აღნიშნა, რეალურად, ეს ცვლილებები უკვე გატარებულია და საჭიროა მათი ასახვა საკანონმდებლო დონეზე.

ბოლო წლების განმავლობაში, ამ ტიპის დანაშაულზე პატიმრობა ფაქტობრივად აღარ გამოიყენება: თუ 2010-2011 წლებში მსგავსი სამართალდარღვევისთვის 31 პირი დააპატიმრეს, 2015-2016 წლებში არ დაფიქსირებულა არც ერთი შემთხვევა. საკანონმდებლო ცვლილებებით, ზედნადების გარეშე 10 000 ლარზე მეტი ღირებულების საქონლის ტრანსპორტირება სისხლის სამართლის დანაშაული აღარ იქნება. ამის ნაცვლად, სამართალდამრღვევი 10 000 ლარით დაჯარიმდება.