ემანუელ მაკრონი ქართველია?!

ეს საინტერესოა - 18:45, 25 Apr, 2017

38784

საქართველოს ისტორიასავით ძველია „ტრადიცია“, რომ ყველა ცნობილ და წარმატებულ ადამიანს ქართული ფესვები უნდა ჰქონდეს, თუ ფესვებს არა, ყვავი-ჩხიკვის მამიდას მაინც ექნება საქართველოსთან კავშირი. სწორედ ამ „ტრადიციამ“ აქცია ქართველად პეტრე I (მას ერეკლე I-ის უკანონო შვილობას აბრალებენ), ნაწილობლივ შაჰ-აბასიც (ბებიის ხაზით), ჯორჯ ბუში (ოღონდ ეს თეორია მხოლოდ უფროსს შეეხო), ვლადიმერ პუტინი (საქართველოსთან ის მეტეხელმა მამინაცვალმა დააკავშირა). რეჯეპ ტაიპ ერდოღანი (მას ლაზური ფესვები აღმოუჩინეს) და კიდევ მრავალი.

ამჯერად შესაძლოა „ჩვენებურების“ რიცხვს საფრანგეთის (მომავალი) პრეზიდენტიც შეემატოს (თუ ევროპას ღმერთი არ გაუბრაზდა და მარინ ლე პენი არ დაატეხა რისხვად). "მტკიცებულება" რომ ემანუელ მაკრონი „ჩვენია“, ვიკიპედიაში მოიპოვება:

მაკრონები — წინარე ქართული ტომი. ბინადრობდა სამხრეთ კოლხეთში. ანტიკური ხანის ავტორების ცნობით, ცხოვრობდნენ ტრაპეზუნტის რაიონში და მის აღმოსავლეთით. მაგალითად, ქსენოფონტი მათ შეხვედრია ტრაპეზუნტის სამხრეთ-აღმოსავლეთით ორი დღის სავალზე. ამ რაიონშივე მაკრონების ყოფნას ადასტურებენ აპოლონიოს როდოსელი, სტრაბონი, პლინიუსი, V საუკუნის ანონიმი მწერალი და სხვები. ზოგიერთი მათგანი (მაგალითად - სტრაბონი) თვლის, რომ მაკრონებს ძველი ავტორები ეძახდნენ აქ მცხოვრებ სანებს (ე. ი. ჭანებს). სახელწოდება „მაკრონში“ თანამედროვე მკვლევრები ხედავენ დასავლეთ ქართველთა ტომების აღმნიშვნელ თანამედროვე ტერმინში (მეგრელ//მარგალ) შემავალ არგ (არკ) ძირს, რომელიც გაფორმებულია ჭანურისათვის დამახასიათებელი ონ სუფიქსით. მაკრონები სხვა ქართველ ტომებთან ერთად ძვ. წ. V საუკუნეში შედიოდნენ სპარსეთის იბერიის XIX სატრაპიაში. მონაწილეობა მიუღიათ სპარსეთის მეფის ქსერქსეს ლაშქრობაში საბერძნეთზე. ამ ომში ისინი შეიარაღებული ყოფილან ისევე, როგორც მოსხები, ტიბარენები და მოსინიკები.