აშშ-ის თავდაცვის მინისტრი, ჯიმ მეტისი ორშაბათს ქაბულში ჩავიდა, სადაც განაცხადა, რომ „აშშ რუსეთს იქ დაუპირისპირდება, სადაც ისინი საერთაშორისო სამართლის ნორმებს არღვევენ.“

მისი განცხადება, ავღანეთში დისლოცირებული ამერიკული და საერთაშორისო ძალების სარდალმა, გენერალმა ჯონ ნიკოლსონმა განმარტა. ჟურნალისტის კითხვაზე - „არ უარყოფთ, რომ რუსეთი უზრუნველყოფს თალიბანის მხარდაჭერას, მათ შორის იარაღით მომარაგებას", ნიკოლსონმა უპასუხა:

„ არა, ამას არ უარვყოფ“ - განაცხადა ნიკოლსონმა.

ორი დღის წინ, თალიბანის მებრძოლები ავღანეთის ჩრდილოეთ ნაწილში, მაზარი-შარიფის გარეუბანში სამხედრო მოსამსახურეებს დაესხნენ თავს. თვდასხმას 200 სამხედრო ემსხვერპლა.

თავდამსხმელები სამთავრობო არმიის ფორმაში იყვნენ გადაცმულნი.

გამოცემის ცნობით, თავდასხმა მაშინ მოხდა, როდესაც ჯარისკაცები პარასკევის ლოცვის შემდეგ, მეჩეთიდან გამოდიოდნენ.

მებრძოლებმა სასადილოში მყოფი ჯარისკაცებიც დაცხრილეს.

გავრცელებული ინფორმაციით, გარდაცვლილია დაახლოებით ათი თალიბიც.

სამხედრო ბაზაზე თალიბანის თავდასხმის შემდეგ, ავღანეთის თავდაცვის მინისტრმა აბდულა ჰან ჰაბიბიმ და სახმელეთო ჯარის ხელმძღვანელმა კადამ შაჰ შაჰიმმა, თანამდებობები დატოვეს.