"ხმას ემანუელ მაკრონს ვაძლევ, ულტრამემარჯვენეების ყოფნა სარისკოა ჩვენი ქვეყნისთვის"

"ხმას ემანუელ მაკრონს ვაძლევ, ულტრამემარჯვენეების ყოფნა სარისკოა ჩვენი ქვეყნისთვის" - ფრანსუა ოლანდი

მსოფლიო - 19:45, 24 Apr, 2017

2644

საფრანგეთის მოქმედმა პრეზიდნეტმა, ფრანსუა ოლანდმა სატელევიზიო გამოსვლაში დაადასტურა, რომ საპრეზიდენტო არჩევნების მეორე ტურში ხმას ემანუელ მაკრონს მისცემს, მის კონკურენტს მარინ ლე პენს კი „საფრანგეთისთვის საფრთხე“ უწოდა.

„ემანუელ მაკრონი - არის ის , ვინც ღირებულებების ერთგულია, რომელიც ფრანგი ხალხის გაერთიანებას უზრუნველყოფს ასეთ სერიოზულ დროს საფრანგეთისთვის, ევროპისა და მსოფლიოსთვის. სასწორზეა ჩვენი ფრანგული იდეა, ჩვენი ერთიანობა, ჩვენი პარტნიორობა ევროკავშირთან და ჩვენი ადგილი მსოფლიოში. ულტრამემარჯვენეების ყოფნა სარისკოა ჩვენი ქვეყნისთვის. ამგვარი რისკის წინაშე შეუძლებელია ჩუმად იყო. მე ხმას ვაძლევ მანუელ მაკრონს“ - განაცხადა ოლანდმა.

საფრანგეთის საპრეზიდენტო არჩევნების წინასწარი პროგნოზი გამართლდა.

მეორე ტურში ცენტრისტი ემანუელ მაკრონი და ნაციონალური ფრონტის ლიდერი მარინ ლე პენი გავიდნენ.

ამ დროისთვის დათვლილია ბიულეტენების 97%, რომლის მიხედვითაც ამომრჩეველთა 23.86% -მა მხარი მოძრაობა «En marche!»-ის დამფუძნებელ, 39 წლის ცენტრისტ ემანუელ მაკრონს დაუჭირა. 21.43 %-იანი მხარდაჭერა მოიპოვა ულტრამემარჯვენე პარტიის ლიდერმა 48 წლის მარინ ლე პენმა.

მაკრონს მეორე ტურში გადასვლას ულოცავენ მსოფლიო ლიდერები. უმაღლესმა ევროკომისარმა ფედერიკა მოგერინიმ კი მას „ჩვენი თაობის იმედი“ უწოდა.

რაც შეეხება პირველ ტურში მაკრონის ოპონენტებს, ფრანსუა ფიიონმა და ბენუა ამონიმ განაცხადეს, რომ მეორე ტურში მხარს ემანუელ მაკრონს უჭერენ და მათ მხარდაჭერებსაც იგივე მოიწოდეს.