დიდი ბრიტანეთის პარლამენტმა, ვადამდელი საპარლამენტო არჩევნების დანიშვნის შესახებ, პრემიერ-მინისტრის ტერეზა მეის ინიციატივას მხარი დაუჭირა.

არჩევნები 8 ივნისს ჩატარდება.

ტერეზა მეიმ ვადამდელი საპარლამენტო არჩევნების დანიშვნის შესახებ 18 აპრილს განაცხადა. მისი თქმით, ეს ქვეყანას ევროკავშირიდან გასვლაში დაეხმარება და გაერთიანებული სამეფოს ხანგრძლივ სტაბილურობას უზრუნველყოფს.

მისივე თქმით, ის მონაწილეობას არ მიიღებს სატელევიზიო დებატებში. მეის თქმით, მას ამომრჩეველთან ურთიერთობა ურჩევნია.

ტერეზა მეიმ ხაზგასმით აღნიშნა, რომ დიდი ბრიტანეთის ევროკავშირიდან გასვლაზე განმეორებითი რეფერენდუმი არ გაიმართება.

დიდი ბრიტანეთის პრემიერ-მინისტრმა ტერეზა მეიმ ლისაბონის 50-ე მუხლის ამოქმედების შესახებ ოფიციალურ წერილს ხელი 29 მარტს მოაწერა, რითაც ბრექსითი ოფიციალურად დაიწყო.

შეგახსენებთ, გაერთიანებულ სამეფოში რეფერენდუმი გასული წლის 23 ივნისს ჩატარდა. ამომრჩეველთა 51,9%-მა ქვეყნის ევროკავშირიდან გასვლას დაუჭირა მხარი, 48,1 % წინააღმდეგი იყო.

ლონდონსა და შოტლანდიაში, ასევე ჩრდილოეთ ირლანდიაში ხმა ევროკავშირში დარჩენის სასარგებლოდ მისცეს, თუმცა უელსსა და ინგლისის საგრაფოებში ევროკავშირიდან გასვლას დაუჭირეს მხარი.

რეფერენდუმის შედეგების გამოცხადებისთანავე დიდი ბრიტანეთის პრემიერ-მინისტრმა დევიდ ქემერონმა თანამდებობა დატოვა. მისი თქმით, არასწორი იქნება, დარჩეს “გემის კაპიტნად” მაშინ, როდესაც დიდი ბრიტანეთის მოსახლეობამ სხვა გზა აირჩია.