გაეროს საერთაშორისო სასამართლომ უკრაინის სარჩელი რუსეთის წინააღმდეგ დროებით შეზღუდვებზე არ დააკმაყოფილა. სარჩელი ეხებოდა, ტერორიზმის ფინანსირებას, პროპაგანდას, დაშინებას, პოლიტიკურ კორუფციასა და კიბერთავდასხმას.

ამავდროულად, სასამართლომ ნაწილობრივ დააკმაყოფილა უკრაინის მოთხოვნა, „რასობრივი დისკრიმინაციის ყველა ფორმის აღმოფხვრის შესახებ კონვენციის შესაბამისად“ შეტანილ სარჩელზე. სასამართლომ დაადგინა, რომ რუსეთმა თავი უნდა შეიკავოს ყირიმელი თათრების უფლებების ხელყოფისგან და უზრუნველყოს ყირიმში მათ მიერ განათლების უკრაინულ ენაზე მიღება.

გაეროს საერთაშორისო სასამართლოში უკრაინის სარჩელის განხილვა რუსეთის წინაღმდეგ 6 მარტს დაიწყო. უკრაინა რუსეთს გაეროს რეზოლუციის დარღვევაში ადანაშაულებს და საერთაშორისო სასამართლოსგან ითხოვდა, რუსეთი აიძულოს შეწყვიტოს სეპარატისტების ფინანსური და ტექნიკური მხარდაჭერა.

მოსმენის პირველ ეტაპზე უკრაინის საგარეო საქმეთა მინისტრის მოადგილე წარსდგა სიტყვით და რუსეთი უკრაინის ტერიტორიაზე კიბერ თავდასხმებში, პროპაგანდაში, ადამიანების დევნასა და სხვა დანაშაულებრივ ქმედებებში დაადანაშაულა.

უკრაინის აღმოსავლეთით, დონბასში კონფლიქტი 2014 წელს დაიწყო, როდესაც დონეცკის და ლუგანსკის ზოგიერთ რაიონში კიევში ხელისუფლების შეცვლის წინააღმდეგ საპროტესტო გამოსვლები დაიწყო. ოფიციალური კიევის პოზიციით, დაპირისპირება მოსკოვის ინსპირირებულია.