აშშ-ის ვიცე-პრეზიდენტის მაიკლ პენსის განცხადებით, ვაშინგტონი ჩრდილოეთ კორეასთან დაკავშირებით მოვლენების განვითარების ნებისმიერი სცენარისთვის მზადაა:

”ჩვენ არაფერს გამოვრიცხავთ და ვაგრძელებთ სამხრეთ კორეელი ხალხის მხარდაჭერას”- განაცხადა პენსმა.

მისი თქმით, აშშ ცდილობს სიტუაციის დარეგულირებას მშვიდობიანი მეთოდებით და მოლაპარაკების გზით. ეს განცხადება პენსმა ჩრდილოეთ და სამხრეთ კორეის საზღვარზე გააკეთა, ამ ორ ქვეყანას შორის არსებულ დემილიტარიზებულ ზონაში, აქ მდებარეობს გაეროს სამეთაურო პუნქტი ”ბონიფასი”, რომელიც ამერიკელი სამხედროების კონტროლქვეშაა.

ფხენიანსა და ვაშინგტონს შორის ურთიერთობა განსაკუთრებულად მიმდინარე წლის გაზაფხულზე დაიძაბა, მარტის დასაწყისში ჩრდილოეთ კორეამ 4 ბალისტიკური რაკეტა გაუშვა და აღნიშნული ქმედება შეაფასა, როგორც რეპეტიცია, იაპონიაში მდებარე აშშ-ის ბაზებზე დასარტყმელად. აღნიშნულმა მოვლენამ საერთაშორისო საზოგადოების მხრიდან კრიტიკა და ამერიკის აღშფოთება გამოიწვია.

ბოლო დღეებში ჩრდილოეთ კორეამ და აშშ-მა ერთმანეთის მიმართ მკვეთრი განცხადებები გააკეთეს. ჩრ. კორეის თქმით ამერიკის მხრიდან დარტყმას ის შესაბამისად უპასუხებს. ფხენიანის საპასუხოდ აშშ-ის პრეზიდენტმა კორეის ნახვარკუნძულისკენ ფლოტი გააგზავნა. ამის შემდეგ ჩრდილოეთ კორეამ კიდევ ერთი რაკეტის გაშვება განახორციელა, თუმცა ის წარუმატებელი აღმოჩნდა.