ამერიკის შეერთებული შატტების მიერ ავღანეთში „ისლამური სახელმწიფოს“ წინააღმდეგ განხორციელებული თავდასხმის შედეგად 36 ბოევიკი გარდაიცვალა და განადგურდა მათი სამხედრო ბაზა, ამის შესახებ ავღანეთის თავდაცვის სამინისტროს მიერ გავრცელებულ განცხადებაშია ნათქვამი.

9 800 კილოგრამიანი არაბირთვული ბომბი, რომელსაც „ყველა ბომბის დედას“ უწოდებენ, გუშინ გვირაბის კომპლექსზე იქნა ჩამოგდებული, რომელიც „ისლამური სახელმწიფოს“ განკარგულებაში იყო პროვინცია ნანგარჰარში.

მომხდარზე კომენტარი აშშ-ის პრეზიდენტმა დონალდ ტრამპმა გააკეთა და იგი „ძალიან წარმატებულ მისიად“ შეაფასა.

გასული წელს, ტრამპი საარჩევნო კამპანიის ფარგლებში აცხადებდა, რომ მისი პრიორიტეტი „ისლამური სახელმწიფოს“ განადგურება იქნებოდა, რომელიც ძირითადად სირიასა და ერაყში მოქმედებს. გასულ კვირას დონალდ ტრამპმა განკარგულება გასცა, სირიაში სამხედრო ბაზის დაბომბვის შესახებ, 50-ზე მეტმა შორი რადიუსის რაკეტამ ხმელთაშუა ზღვიდან, ორი სამხედრო გემის საშუალებით, სამხედრო ბაზა დაბომბა, ეს იყო პასუხი ასადის რეჟიმის წინააღმდეგ, რომელმაც სირიაში ქიმიური იარაღი გამოიყენა და 72 ადამიანის სიცოცხლე იმსხვერპლა, მათ შორის ათობით ბავშვი, ასობით ადამიანი კი დაშავდა.

„თუ გადახედავთ იმას, რაც უკანასკნელი 8 კვირის განმავლობაში მოხდა და შეადარებთ ამას უკანასკნელ 8 წელიწადს, დაინახავთ, რომ არსებობს ძალიან დიდი განსხვავება“, - განუცხადა ტრამპმა ჟურნალისტებს თეთრ სახლში.

დონალდ ტრამპი ჯერჯერობით არ საუბრობს იმ გეგმებზე, რომელიც ავღანეთთან მიმართებით აშშ-ს აქვს, სადაც აშშ-ის დაახლოებით 8 400 სამხედრო იმყოფება.