"ბაშარ ასადი ყასაბია" - დონალდ ტრამპი

მსოფლიო - 11:28, 13 Apr, 2017

2138

აშშ-ის პრეზიდენტმა დონალტ ტრამპმა, ნატოს გენერალურ მდივანთან შეხვედრის შემდეგ გამართულ პროსკონფერენციაზე, სირიაში განხორციელებულ ქიმიურ თავდასხმაზე საუბრისას, პრეზიდენტ ბაშარ ასადს ყასაბი უწოდა.

„ის ყასაბია, ყასაბი“ - განაცხადა ტრამპმა.

ტრამპის "ეპითეტი" მოულოდნელი არავისთვის ყოფილა, თუ გავითვალისწინებთ იმას, რომ წარსულში მან ასადს "ცხოველი" და "ბოროტი" უწოდა.

სირიაზე სარაკეტო იერიშის განხორციელების საკითხზე დასმულ შეკითხვაზე კი ტრამპმა განაცხადა :

„ეჭვიც არ მეპარება, რომ სწორად მოვიქეცით.“

დონალდ ტრამპმა აშშ-ის სახელმწიფო მდივნისა და რუსეთის საგარეო საქმეთა მინისტრის შეხვედრაზეც ისაუბრა და განაცხადა, რომ შეხვედრა იმაზე კარგად ჩატარდა, ვიდრე მოელოდა.

შეგახსენებთ, 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ. შემთხვევას 89 ადამიანი ემსხვერპლა. დაშავებულია 500-ზე მეტი ადამიანი. დაღუპულთა შორის ათეულობით ბავშვია. თავდასხმის შედეგების ამსახველი შემზარავი კადრები ინტერნეტში გავრცელდა.

აღნიშნულის საპასუხოდ, აშშ-მა წერტილოვანი სარაკეტო იერიში მიიტანა სირიაში, ჰომსის პროვინციაში ალ შარიათის სამხედრო ბაზაზე, საიდანაც სავარაუდოდ ქიმიური თავდასხმა მოხდა. აშშ-მა ავიაიერიშები ხმელთაშუა ზღვაში ორი გემიდან განხორციელა და 59 შორი რადიუსის რაკეტა გამოიყენა.

მსოფლიო ლიდერებმა აშშ-ის გადაწყვეტილებას სრული მხარდაჭერა გამოუცხადეს.

რუსეთის პრეზიდენტმა ვლადიმირ პუტინმა აშშ-ის მიერ სირიის სამხედრო ბაზაზე განხორციელებულ სარაკეტო იერიშს "სუვერენული სახელმწიფოს წინააღმდეგ აგრესია" უწოდა. რუსეთის საგარეო უწყებამ განცხადებაც გაავრცელა, რომელშიც ნათქვამია, რომ ეს „სუვერენული სირიისადმი აგრესიის ნათელი აქტია“, რომელიც ვაშინგტონს წინასწარ ჰქონდა მომზადებული.