"ბორუსიას" ავტობუსთან ნაპოვნი წერილის ავტორები, თავდასხმაზე პასუხისმგებლობას იღებენ

მსოფლიო - 12:49, 12 Apr, 2017

4280

დორტმუნდში, საფეხბურთო კლუბ დორტმუნდის „ბორუსიას“ ავტობუსთან მომხდარი აფეთქების ადგილზე პოლიციამ წერილი იპოვა.

როგორც პროკურატურის წარმომადგენლები აცხადებენ, წერილის ავტორები აფეთქებაზე პასუხისმგებლობას იღებენ.

სპეციალურ პრესკონფერენციაზე პროკურატურის წარმომადგენლება წერილის შინაარსზე არ ისაუბრეს, თუმცა განაცხადეს რომ ნებისმიერ ვერსიას განიხილავენ. მათივე თქმით, ჯერჯეროებით არ არსებობს რაიმე მტკიცებულება, რაც ტერაქტზე მიუთითებს.

სამართალდამცველების მოსაზრებით, აღნიშნული ინციდენტი საფეხბურთო კლუბ „ბორუსიაზე“ მიმართული თავდასხმა იყო.

გუშინ, გერმანიის ქალაქ დორტმუნდში 3 აფეთქება მოხდა.

გზაზე დამონტაჟებული სამივე ასაფეთქებელი მოწყობილობა იმ დროს ამოქმედდა, როდესაც ფეხბურთელთა ნაკრები ავტობუსით ჩემპიონთა ლიგის მატჩზე მიემართებოდა.

აფეთქების შედეგად დაზიანდა ავტობუსი, რომელსაც დორტმუნდის „ბორუსიას“ ფეხბურთელები ჩემპიონთა ლიგის მატჩზე მიჰყავდა. დაშავდა ფეხბურთელი მარკ ბარტა, რომელიც კლინიკაში გადაიყვანეს და ხელზე ოპერაცია ჩაუტარდა.

გავრცელდა ინფორმაცია, რომ სასტუმროსთან, სადაც დორტმუნდის „ბორუსიას“ ფეხბურთელები იყვნენ განთავსებული, საეჭვო ნივთი იპოვეს,

აფეთქების გამო დორტმუნდის „ბორუსია“- „მონაკოს" თამაში 12 აპრილისთვის გადაიდო.