რუსეთის პრეზიდენტმა ვლადიმირ პუტინმა ჩინური ფაიფურის დეკორატიულ ფიგურებს შეადარა ნატოს წევრების რეაქციას, რომელიც მათ შეერთებული შტატების მიერ სირიის ავიაბაზის დაბომბვაზე ჰქონდათ.

“რა რეაქცია ჰქონდათ ნატოს წევრებს? ისინი ჩინური ფიგურებივით თავს იქნევენ და არ აანალიზებენ იმას რაც ხდება“ - განაცხადა პუტინმა ტელეარხ „მირთან“ ინტერვიუში.

მისი თქმით, არ არსებობს მტკიცებულები იმის შესახებ, რომ სირიის სამთავრობო არმიის მიერ ქიმიური იარაღი გამოიყენა.

„ თუმცა სახეზეა საერთაშორისო ნორმების დარღვევა, რადგან გაეროს უშიშროების საბჭოს სანქციის გარეშე, სუვერენულ ქვეყანაზე იერიში განხორციელდა” - დასძინა პუტინმა.

შეგახსენებთ, 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ. შემთხვევას 89 ადამიანი ემსხვერპლა. დაშავებულია 500-ზე მეტი ადამიანი. დაღუპულთა შორის ათეულობით ბავშვია. თავდასხმის შედეგების ამსახველი შემზარავი კადრები ინტერნეტში გავრცელდა.

აღნიშნულის საპასუხოდ, აშშ-მა წერტილოვანი სარაკეტო იერიში მიიტანა სირიაში, ჰომსის პროვინციაში ალ შარიათის სამხედრო ბაზაზე, საიდანაც სავარაუდოდ ქიმიური თავდასხმა მოხდა. აშშ-მა ავიაიერიშები ხმელთაშუა ზღვაში ორი გემიდან განხორციელა და 59 შორი რადიუსის რაკეტა გამოიყენა.

მსოფლიო ლიდერებმა აშშ-ის გადაწყვეტილებას სრული მხარდაჭერა გამოუცხადეს.

რუსეთის პრეზიდენტმა ვლადიმირ პუტინმა აშშ-ის მიერ სირიის სამხედრო ბაზაზე განხორციელებულ სარაკეტო იერიშს "სუვერენული სახელმწიფოს წინააღმდეგ აგრესია" უწოდა. რუსეთის საგარეო უწყებამ განცხადებაც გაავრცელა, რომელშიც ნათქვამია, რომ ეს „სუვერენული სირიისადმი აგრესიის ნათელი აქტია“, რომელიც ვაშინგტონს წინასწარ ჰქონდა მომზადებული.