მსოფლიო პიტერ ქუინს ემშვიდობება - Homeland-ის შოკისმომგვრელი ფინალი, რას უნდა ველოდოთ მომავალში

ეს საინტერესოა - 17:05, 11 Apr, 2017

6354

მას შემდეგ რაც კერი მეტისონმა ტერორისტებისგან იხსნა აშშ-ის დედაქალაქი, გადაარჩინა ახლო აღმოსავლეთი და გერმანია, აშშ-ის ცენტრალური სადაზვერვო სააგენტოს ყოფილი აგენტი „სამშობლოს“(Homeland) მე-6 სეზონში ნიუ-იორკში დაბრუნდა. სად წაიყვანს მას ბედი, ამას მას შემდეგ გავიგებთ, რაც „სამშობლოს“ მე-7 სეზონი გამოვა. მომავალი სეზონები რომ ნამდვილად იქნება, ამის შესახებ სერიალის შემქმნელებმა ჯერ კიდევ მე-6 სეზონის გამოსვლამდე დადეს პირობა და მაყურებელს მე-7, მე-8 სეზონებსაც დაპირდნენ. პასუხი კითხვაზე, როდის გამოვა მე-7 სეზონი, ცოტა რთულია. პირველი 5 წელი სერიალის სეზონები რეგულარულად შემოდგომით გამოდიოდა, განსხვავებული იყო მე-6 სეზონი, როდესაც ის 2016 წლის შემოდგომის ნაცვლად 2017 წლის იანვარში დაიწყო, სწორედ ამის გამო ნაკლებ მოსალოდნელია, რომ სერიალი ძველ გრაფიკს დაუბრუნდეს და მე-7 სეზონი 2017 წლის შემოდგომაზე დაიწყოს.

მიუხედავად იმისა, როდის დაიწყება და დამთავრდება მე-7 სეზონი, მე-6 სეზონის ფინალმა დატოვა მოლოდინი, რომ კერის ისედაც გართულებული ცხოვრება, კიდევ უფრო გართულდება.

ახლა კი რაც შეეხება მე-6 სეზონის ფინალს, Homeland-მა გაანადგურა თავისი ერთ-ერთი ვარსკვლავი და მთავარი გმირი, თუ თქვენ ჯერ არ გინახავთ ფინალური სერია, მაშინ ჯობს სტატიის კითხვა აქ შეწყვიტოთ:

მსხვერპლი პიტერ ქუინი გახდა, კერი მეტისონის მეგობარი და მასზე უიმედოდ შეყვარებული. ის სპეცრაზმმა მოკლა, როდესაც ის კერის და არჩეული პრეზიდენტის ელიზაბეტ კინის მკვლელებისგან დახსნას ცდილობდა. მკვლელობა რომელიც მე-12 სერიის შუა ნაწილში მოხდა, სისხლიანი და შოკისმომგვრელი იყო. მოუსვენარმა აგენტმა თვითშეწირვის „რიტუალი“ შეასრულა.

პიტერ ქუინის სიკვდილმა სერიალის თაყვანისმცემლებში დიდი შოკი გამოიწვია, მათ ჯერ ბოლომდე გამოტირებული ნიკოლას ბროუდიც არ ჰყავდათ, როდესაც მის გზას კერიზე შეყვარებული მორიგი მამაკაცი გაუყენეს. პიტერი ღირსეულად გამოიგლოვა ქართველმა თაყვანისმცემელმაც, სწორედ პიტერ ქვინია ერთ-ერთი ყველაზე ხშირად ნახსენები სახელი გუშინ დღიდან მოყოლებული და ამ ამბავმა ბევრი პოლიტიკური მოვლენა გადაფარა საქართველოში.

პიტერ ქვინი ერთხელ უკვე დაბრუნდა „იმ ქვეყნიდან“, როდესაც ის ზარინით მოწამლული გადაარჩინეს. ფაქტია რომ რეჟისორები მის დაბრუნებას აღარ აპირებენ. თუმცა ალექს განსა, რომელიც „სამშობლოს“ შემქმნელი და აღმასრულებელი პროდიუსერია, შეუძლებლად არ მიიჩნევს, რომ სერიალში „ფლეშბექის“ წყალობით ისევ გამოჩნდეს ნიკოლას ბროუდი.