"რუსეთმა ვერ შეძლო, სირიაში ქიმიური თავდასხმა შეეჩერებინა"

"რუსეთმა ვერ შეძლო, სირიაში ქიმიური თავდასხმა შეეჩერებინა" - რექს ტილერსონი

მსოფლიო - 13:35, 10 Apr, 2017

2038

აშშ-ის სახელმწიფო მდივნის, რექს ტილერსონის განცხადებით, რუსეთმა ვერ შეძლო,სირიაში ქიმიური თავდასხმა შეეჩერებინა.

ტილერსონმა თქმით, რუსეთმა არ შეასრულა საერთაშორისო ვალდებულებები. მისი განცხადებით, 2013 წლის სექტემბერში, რუსეთმა პასუხისმგებლობა აიღო, რომ სირიის ქიმიური იარაღის მარაგებს გაანადგურებდა, თუმცა ეს არ შესრულდა და ქიმიური შეტევა შესაძლებელი გახდა. ამიტომაც, აშშ-ის სახელმწიფო მდივნის თქმით, სირიაში ქიმიური იარაღის გამოყენებაზე პასუხისმგებლობა, რუსეთს ეკისრება.

ტილერსონის თქმით, მნიშვნელოვანი არ არის „იყო თუ არა რუსეთი თანამონაწილე, ან მისი სპეციალისტები აღმოჩნდნენ თუ არა აკომპეტენტურები, ან სირიის ხელისუფლება მას არ დაემორჩინა“, ნებისმიერ შემთხვევაში რუსულმა მხარემ „არ შეასრულა საერთაშორისო საზოგადოების წინაშე ნაკისრი ვალდებულებები.“

შეგახსენებთ, 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ. შემთხვევას 89 ადამიანი ემსხვერპლა. დაშავებულია 500-ზე მეტი ადამიანი. დაღუპულთა შორის ათეულობით ბავშვია. თავდასხმის შედეგების ამსახველი შემზარავი კადრები ინტერნეტში გავრცელდა.

აღნიშნულის საპასუხოდ, აშშ-მა წერტილოვანი სარაკეტო იერიში მიიტანა სირიაში, ჰომსის პროვინციაში ალ შარიათის სამხედრო ბაზაზე, საიდანაც სავარაუდოდ ქიმიური თავდასხმა მოხდა. აშშ-მა ავიაიერიშები ხმელთაშუა ზღვაში ორი გემიდან განხორციელა და 59 შორი რადიუსის რაკეტა გამოიყენა.

მსოფლიო ლიდერებმა აშშ-ის გადაწყვეტილებას სრული მხარდაჭერა გამოუცხადეს.

სირიის სამხედრო ბაზაზე სარაკეტი იერიში მხოლოდ რუსეთმა და ირანმა დაგმეს.

რუსეთის პრეზიდენტმა ვლადიმირ პუტინმა აშშ-ის მიერ სირიაზე განხორციელებულ სარაკეტო იერიშს "სუვერენული სახელმწიფოს წინააღმდეგ აგრესია" უწოდა. მოგვიანებით, რუსეთის საგარეო უწყებამ განცხადებაც გაავრცელა, რომელშიც ნათქვამია, რომ ეს „სუვერენული სირიისადმი აგრესიის ნათელი აქტია“, რომელიც ვაშინგტონს წინასწარ ჰქონდა მომზადებული.