სირიაში ქიმიური თავდასხმით დაზარალებულ ქალაქზე მორიგი იერიში განხორციელდა

მსოფლიო - 18:47, 08 Apr, 2017

5196

სირიაში ქიმიური შეტევით დაზარალებულ ქალაქზე მორიგი იერიში განხორციელდა.

როგორც CNN იტყობინება, სირიაში მომუშავე დამკვირვებლები აცხადებენ, რომ ხან-შეიხუნის დაბობვის შედეგად ერთი ქალი დაიღუპა, სამი ადამიანი კი დაშავდა.

ამ დროისთვის უცნობია, ვინ განახორციელა ავიადარტყმა, თუმცა დამკვირვებლები აღნიშნავენ, რომ სირიის სამთავრობო ძალებმა რეგიონში საჰაერო ოპერაცია განაახლეს.

შეგახსენებთ, 4 აპრილს, სირიის ჩრდილო დასავლეთში, იდლიბის ქალაქ ხან-შეიხუნში, რომლებსაც ამბოხებულები აკონტროლებენ ქიმიური იარაღით თავდასხმა მოხდა, რომელშიც ბაშარ ალ ასადის რეჟიმს ადანაშაულებენ. შემთხვევას 89 ადამიანი ემსხვერპლა. დაშავებულია 500-ზე მეტი ადამიანი. დაღუპულთა შორის ათეულობით ბავშვია. თავდასხმის შედეგების ამსახველი შემზარავი კადრები ინტერნეტში გავრცელდა.

აღნიშნულის საპასუხოდ, აშშ-მა წერტილოვანი სარაკეტო იერიში მიიტანა სირიაში, ჰომსის პროვინციაში ალ შარიათის სამხედრო ბაზაზე, საიდანაც სავარაუდოდ ქიმიური თავდასხმა მოხდა. აშშ-მა ავიაიერიშები ხმელთაშუა ზღვაში ორი გემიდან განხორციელა და 59 შორი რადიუსის რაკეტა გამოიყენა.

მსოფლიო ლიდერებმა აშშ-ის გადაწყვეტილებას სრული მხარდაჭერა გამოუცხადეს.